NASA-nın keçmiş alimi İnqrid Honkala üç dəfə klinik ölüm yaşadığını və hər dəfə oxşar hisslərlə qarşılaşdığını iddia edib.
Bizim.Media xəbər verir ki, 55 yaşlı tədqiqatçı bu təcrübələrin onun həyat və ölüm barədə təsəvvürlərini tamamilə dəyişdiyini bildirib.
Boqotadan olan Honkala dəniz elmləri üzrə doktorluq dərəcəsinə malikdir. O, karyerası ərzində NASA və ABŞ Hərbi Dəniz Qüvvələri ilə əməkdaşlıq edib.
Alimin sözlərinə görə, ilk dəfə ölümün astanasına erkən uşaqlıq dövründə düşüb. O, buz kimi su ilə dolu çənə yıxıldığını və anası onu həyata qaytarana qədər huşsuz vəziyyətdə qaldığını deyib.
Honkala iddia edir ki, həmin anda bədənindən ayrılma hissi yaşayıb. Onun sözlərinə görə, qorxu hissi “dərin sakitlik və sükut”la əvəzlənib.
O bildirib ki, həmin an öz bədənini kənardan müşahidə edib və baş verənləri genişlənmiş şüur vəziyyəti kimi qəbul edib.
Honkala bu təcrübəni şəxsi sərhədlərin yox olması və şüurun “işıq və birlik məkanı”na çevrilməsi kimi təsvir edib.
Onun sözlərinə görə, sonradan daha iki dəfə oxşar hal yaşayıb. Bunlardan biri 25 yaşında motosiklet qəzasından sonra, digəri isə 52 yaşında əməliyyat zamanı təzyiqinin kəskin düşməsi nəticəsində baş verib.
Keçmiş alim bildirir ki, hər üç halda eyni sakitlik, qorxunun yox olması və “genişlənmiş qavrayış” hissi ilə qarşılaşıb.
Honkalanın sözlərinə görə, bu hadisələr onun dünyagörüşünə ciddi təsir edib. O hesab edir ki, elm və mənəvi təsəvvürlər eyni reallığı fərqli tərəflərdən izah edə bilər.
O, bu təcrübələrdən sonra ölümdən qorxmadığını, ölümü son deyil, şüur halının dəyişməsi kimi qəbul etdiyini deyib.
Bununla belə, Honkala etiraf edir ki, onun izahları elmi dairələrdə skeptik qarşılanır. Çünki alimlərin bir çoxu bu cür halları beynin stress reaksiyası, fizioloji və psixoloji proseslərlə izah edir.
Keçmiş NASA əməkdaşı isə yaşadıqlarının real olduğunu və insan şüurunun yalnız beyin fəaliyyəti ilə məhdudlaşmadığını düşünür.
Bizim.Media
