Bakıda "Koroğlu" körpüsündəki təhlükəli vəziyyətlə bağlı yayılan görüntülər narahatlığa səbəb olub.
Pravda.az xəbər verir ki, bu barədə jurnalist Fəridə Aslanova (Rüstəmova) sosial şəbəkədə paylaşıb.
“Dəmiryolu qatarı ilə gedirdim. "Koroğlu" stansiyasını keçəndə diqqətimi bayırda çoxşaxəli körpünün bir qanadı cəlb etdi. Elə bildim, körpü incəldiyi yerdən qopub düşəcək” - jurnalist bildirib.
Məsələ ilə bağlı Azərbaycan Avtomobil Yolları Dövlət Agentliyinin İctimaiyyətlə əlaqələr şöbəsinin rəisi Anar Nəcəfli Pravda.az-ın sorğusuna cavab olaraq bildirib ki, sözügedən görüntüdə görünən hissə aşırım qurğusunun konsolunun dayaq üzərinə oturduğu zonada yerləşən deformasiya tikişidir, yəni temperatur şovudur: “Həmin tikiş körpü konstruksiyasında temperatur dəyişiklikləri və digər istismar yükləri nəticəsində yaranan hərəkətlərin kompensasiya olunması üçün nəzərdə tutulmuş konstruktiv elementdir və texniki baxımdan normal hesab olunur. Yəni yayılan görüntü körpüdə hər hansı qəza vəziyyətinin və ya təhlükəli konstruktiv problemin göstəricisi deyil. Körpülərdə mütəmadi texniki baxış və monitorinqlər həyata keçirilir, onların istismar vəziyyəti aidiyyəti mütəxəssislər tərəfindən daim nəzarətdə saxlanılır. Təəssüf ki, bəzən mühəndis və ya mütəxəssis rəyi alınmadan yayılan məlumatlar cəmiyyətdə əsassız narahatlıq və qorxu yaradır, texniki məsələlərin yanlış anlaşılmasına səbəb olur”.
Aytəkin Qardaşova
