Azərbaycanda inklüziv şəhərlər və əlilliyi olan şəxslərin hüquqları dövlət siyasətinin əsas prioritetlərindəndir.
APA xəbər verir ki, bunu DOST İnklüziv İnkişaf və Yaradıcılıq Mərkəzinin direktoru Elnarə Ansari Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "“Əlçatanlığın hüdudlarından kənar: hamı üçün layiqli mənzil hüququnun təmin edilməsi" mövzusunda əlilliyi olan insanların hüquqları üzrə dəyirmi masada çıxışinda deyib.
Əmək və Əhalinin Sosial Müdafiəsi Nazirliyinin nümayəndəsi Azərbaycanda inklüziv şəhərsalma, əlilliyi olan şəxslərin hüquqları və sosial müdafiə sahəsində həyata keçirilən islahatlar barədə məlumat verib.
Çıxışda vurğulanıb ki, bütün ölkələrin ortaq məsuliyyəti şəhərlərin təkcə inkişaf edən deyil, həm də əlçatan, inklüziv və hər kəs üçün rahat məkanlara çevrilməsidir.
“Bu gün bütün ölkələr ortaq məsuliyyət daşıyır ki, şəhərlərimiz təkcə böyüyən və inkişaf edən deyil, həm də əlçatan, inklüziv və hər kəs üçün rahat olsun”.
Qeyd olunub ki, Azərbaycanda əlilliyi olan şəxslərin hüquqlarının müdafiəsi və sosial rifahının təmin edilməsi dövlət siyasətinin əsas istiqamətlərindən biridir. Ölkə 2008-ci ildən BMT-nin Əlilliyi olan Şəxslərin Hüquqları Konvensiyasına qoşularaq bu sahədə mühüm islahatlar həyata keçirib.
“2008-ci ildən BMT Konvensiyasına qoşulduqdan sonra Azərbaycan milli qanunvericiliyi beynəlxalq standartlara uyğunlaşdırmaq və tibbi modeldən sosial modelə keçid istiqamətində ciddi islahatlar aparıb”.
Çıxışda 2018-ci ildə qəbul edilən “Əlilliyi olan şəxslərin hüquqları haqqında” qanunun inklüziv siyasət üçün mühüm hüquqi baza yaratdığı bildirilib.
Eyni zamanda, rəqəmsal əlillik qiymətləndirmə sistemi və sosial müavinətlərin elektron qaydada təyinatı kimi innovativ islahatlar qeyd olunub.
“Biz regionda ilk ölkələrdən biriyik ki, tam elektron əlillik qiymətləndirmə sistemini tətbiq etmişik. Sosial ödənişlər artıq vətəndaş müraciəti olmadan avtomatik qaydada təyin olunur”, - o vurğulayib.
Nümayəndə vurğulayıb ki, əlçatanlıq təkcə fiziki infrastruktur deyil, bütün sahələrdə bərabər iştirak deməkdir.
2021-ci ildə qəbul edilən uyğunlaşdırılmış infrastruktur qaydaları və 2019-cu ildən tətbiq olunan əmək standartlarının inklüziv məşğulluğu gücləndirdiyi bildirilib.
Çıxışda Əmək və Əhalinin Sosial Müdafiəsi Nazirliyi yanında fəaliyyət göstərən DOST İnklüziv İnkişaf və Yaradıcılıq Mərkəzinin fəaliyyəti xüsusi qeyd olunub:
“Bu mərkəz universal dizayn və inklüzivliyin uğurlu nümunəsidir. Burada əlçatanlıq, psixososial dəstək və işarə dili xidmətləri vahid məkanda təqdim olunur”.
Qeyd olunub ki, bu model artıq regionlara da genişləndirilir və minlərlə benefisiar bacarıqlar əldə edərək iqtisadi imkanlara çıxış qazanır.
Çıxışda Ansari Azərbaycan təcrübəsinin BMT Dayanıqlı İnkişaf Məqsədlərinə uyğun olduğu vurğulayıb və inklüzivliyin “heç kimi geridə qoymamaq” prinsipinin əsas təzahürü olduğunun bildirib:
“İnklüziv şəhərlər yalnız siyasət seçimi deyil, həm də mənəvi məsuliyyətdir”
