Ceydon Sanço tarixi ilkə imza atdı

“Aston Villa”nın hücumçusu Ceydon Sanço “Frayburq”a qarşı keçirdikləri Avropa Liqasının final matçında meydana çıxmaqla rekorda imza atıb.

Arena.az xəbər verir ki, 26 yaşlı ingiltərəli futbolçu tarixdə ardıcıl 3 mövsüm 3 müxtəlif klubla fərqli qitəmiqyaslı turnirlərin finalında oynayan ilk futbolçu olub.

O, 2024/2025-ci illər mövsümündə Avropa Konfrans Liqasını “Çelsi”nin heyətində qazanıb. Həmin vaxt London təmsilçisi finalda “Betis”ə 4:1 hesabı ilə qalib gəlib.

2023/2024-ci illər mövsümündə isə Sanço Dortmund “Borussiya”sı ilə UEFA Çempionlar Liqasının finalında məğlubiyyət acısı yaşayıb. Almaniya klubu həlledici oyunda Madrid “Real”ına 0:2 hesabı ilə uduzub.

Müqavilə ilə “Mançester Yunayted”ə məxsus olan Ceydon Sanço hər 3 finalda icarə əsasında çıxış edib. Onun bu yay Mançester təmsilçisindən azad agent kimi ayrılacağı bildirilir.

Qeyd edək ki, “Mançester Yunayted” vaxtilə bu futbolçunun transferi üçün 85 milyon avro ödəyib.