Sürücülər Avropada az tanınan yol hərəkəti qaydaları barədə xəbərdar edilir. Bu qaydaların pozulması turistlər üçün xarici səfərlər zamanı böyük məbləğdə cərimələrlə nəticələnə bilər.
HİT.az xəbər verir ki, "Express" nəşrinin yazdığına görə, aviabiletlərin bahalaşması fonunda daha çox britaniyalı Avropanın kontinental hissəsinə şəxsi avtomobili ilə səyahət edir. Lakin ekspertlər bildirirlər ki, yerli qanunları bilməmək sürücülərə minlərlə avro zərər vura və istirahəti poza bilər.
"Footman James" şirkətinin mütəxəssisləri səyahətə çıxmazdan əvvəl gediləcək ölkənin qaydaları ilə yaxından tanış olmağı, həmçinin sığorta şərtlərini yoxlamağı tövsiyə edirlər.
Şirkətin xüsusi istirahət bölməsinin rəhbəri Samanta Smit bildirib: "Avropada avtomobil sürmək, xüsusilə klassik avtomobillə səyahət edənlər üçün, olduqca maraqlı təcrübədir. Lakin ölkələr üzrə qanunlar və tələblər ciddi şəkildə fərqlənə bilər".
O əlavə edib ki, sürücülər sığortalarının düzgün olduğuna, yürüş məhdudiyyəti və səyahət üçün kifayət qədər təminatın olub-olmamasına diqqət etməlidirlər.
"Qaydaları anlamağa və avtomobili hazırlamağa vaxt ayırmaq səyahətin uğurlu keçməsində həlledici ola bilər", deyə Smit vurğulayıb.
Fransada, məsələn, sürət kameralarının yerini dəqiq göstərən naviqasiya sistemlərindən istifadə qadağandır. Qaydanı pozanlar 1500 avroya qədər cərimə oluna, cihazları və hətta avtomobilləri müsadirə edilə bilər.
Almaniyada sürücülər avtobanda yanacaq bitməsi səbəbilə dayanarsa, bu, qayda pozuntusu sayılır və 30–70 avro aralığında cərimə tətbiq edilir.
Portuqaliyada avtomobildə ehtiyat benzin qablarının daşınması qadağandır. Bu qaydanın pozulmasına görə 1500–15 000 avro arası cərimə tətbiq oluna bilər.
Finlandiyada isə sürücülər gündüz də daxil olmaqla hər zaman işıqları yandırılmış vəziyyətdə hərəkət etməlidirlər. Burada faraların qısa şəkildə yandırılıb-söndürülməsi isə çox vaxt yol qəzası və ya vəhşi heyvan barədə xəbərdarlıq kimi qəbul edilir.
İsveçrədə eynək və ya kontakt linza istifadə edən sürücülər ehtiyat eynək daşımalıdırlar. Bundan əlavə, avtomobildə qeydiyyat ölkəsini göstərən stikerdə, məsələn "UK", yer almalıdır.
İspaniyada isə bəzi hallarda ayaqyalın və ya şapşapla avtomobil idarə etməyə görə cərimə tətbiq oluna bilər. Polis bu ayaqqabının idarəetməni çətinləşdirdiyini hesab edərsə, cərimə 200 avroya qədər çata bilər.
Samir
