AZ
Mövzular
Digər
21.06.2025 ◦ 15:53

Kənan Məstəliyev: "UFC-nin Bakıya gəlməsi müasir idman aləmində planetar hadisədir"

"UFC Azərbaycanda yeni bir layihədir. Ümumiyyətlə, Azərbaycanda ənənəvi döyüş və təkbətək idman növlərinə maraq həmişə böyük olub. Məsələn, güləş, sambo və digərlərinə həmişə maraq olub. Ona yaxın olan karate və kikboksinq döyüş növləri də Azərbaycanda xüsusi populyarlığa malikdir. Kikboksinqdə Eduard Məmmədov, karatedə isə karatenin brilyantı olan Rafael Ağayev kimi döyüşçülərimiz var".

Bu sözləri Demokrat.az-a açıqlamasında tanınmış idman jurnalisti, “Rekord.az” saytının baş redaktoru Kənan Məstəliyev deyib.

O bildirib ki, UFC isə Azərbaycan üçün bir qədər yeni layihədir, çünki bu, əsasən ABŞ-də və Qərbi Avropada yayılan bir idman növüdür:

"Son 10-15 ildə bu yarışlara maraq artıb. Azərbaycanlı döyüşçülər də son illərdə bu yarışlara qatılmağa və uğurlar qazanmağa başlayıblar.

Mən düşünürəm ki, UFC-də təmsil olunmaq Azərbaycan üçün vacibdir, çünki UFC planetar səviyyədə məşhur layihədir. Mərkəzi döyüşlərdə iştirak edən idmançılar dünyaca tanınır, ölkələrini tanıdırlar. UFC-nin Bakıya gəlməsi və burada mərhələsinin keçirilməsi böyük bir uğurdur".

Onun sözlərinə görə, UFC-nin ABŞ və Avropadan kənara çıxması nadir haldır və bu yarışın Azərbaycana gəlməsi region üçün çox önəmlidir:

"Hətta Rusiyada belə bu layihə keçirilməyib. Qazaxıstan, Özbəkistan, Gürcüstan kimi ölkələrdə də keçirilməyib. Onlar təəccüblənirlər ki, Bakı bunu necə əldə edib. UFC-nin Bakıya gəlməsi müasir idman aləmində planetar hadisədir.

Layihənin müəlliflərini, o cümlədən Gənclər və İdman Nazirliyini təbrik edirəm. Cənab Prezident İlham Əliyev UFC rəhbəri Dana White və komandasını qəbul edərək bu layihənin Azərbaycana gəlməsinə verdiyi dəyəri göstərdi. UFC-nin Bakıya gəlməsi təkcə döyüş idmanlarına deyil, ümumiyyətlə idmana marağı artıracaq və bu, yalnız müsbət nəticələr doğuracaq".


Əfsanə Kamal
Demokrat.az
Seçilən
81
17
demokrat.az

10Mənbələr