Müəllif:Mehin Qasımova,Banco.az
ABŞ prezidenti Donald Trampın administrasiyası mikrosxem dizaynı proqram təminatının Çinə ixracına qoyulan bəzi məhdudiyyətləri aradan qaldırıb.
Banco.az xəbər verir ki, bu barədə çərşənbə günü Bloomberg məlumat yayıb .
Məlumata görə, ABŞ Ticarət Nazirliyi Almaniyanın “Siemens AG” texnologiya şirkətinə Çində bizneslə məşğul olmaq üçün artıq xüsusi dövlət lisenziyalarına ehtiyac olmadığı barədə xəbərdarlıq edib. Şirkət artıq Çin müştərilərinə proqram təminatı və texnologiyaya tam girişi qaytarıb.
Bloomberg qeyd edir ki, Vaşinqton bu ixrac nəzarətini Pekinin ABŞ-a kritik minerallara qoyduğu məhdudiyyətlərə cavab olaraq may ayında tətbiq edib. Ötən həftə imzalanmış ticarət sazişinin şərtlərinə əsasən, ABŞ Çinə çip proqram təminatının, həmçinin etan və reaktiv mühərriklərin daşınmasına icazə verəcəyini vəd edib. Pekin də öz növbəsində nadir torpaq metallarının ABŞ-a daşınmasını sürətləndirməlidir.
İyulun 2-də daha əvvəl Reuters xəbər vermişdi ki, Vaşinqton Çinə etan ixracını bərpa etməyə hazırdır. Agentliyin məlumatına görə, Amerika administrasiyasının tətbiq etdiyi məhdudiyyətlərdən sonra Meksika körfəzi sahillərində boş qalan ən azı səkkiz etanlı gəmi hazırda Çinə yollanır.
