AZ
Mövzular
Dünya
03.07.2025 ◦ 19:35

Deputat: “Azərbaycan və Rusiya arasındakı münasibətlər ciddi zədələnib”

“Artıq bir müddətdir Rusiyada miqrant mövzusu şişirdilir. Bundan başqa, AZAL təyyarəsinin vurulmasından sonra münasibətlərdə bir soyuqluq hiss olunur. Qeyd etmək lazımdır ki, bu məsələdə Rusiya tərəfi susqunluq və mövzunu yayındırmaq siyasətini seçib. Halbuki, Prezidentimizin açıq şəkildə verdiyi bəyanatlar göstərdi ki, Azərbaycan bu məsələnin unudulmasına imkan verməyəcək”.

Milli Məclisin deputatı Müşfiq Cəfərov Demokrat.az-a açıqlamasında deyib ki, son günlər Rusiya-Azərbaycan münasibətlərində gərginlik müşahidə olunur:

“Bu gərginliyin artmasında Rusiya dumasının üzvlərinin, eləcə də media orqanlarının rolu böyükdür. Lakin hazırda Azərbaycan və Rusiya arasında münasibətlər əvvəllər müşahidə olunmamış dərəcədə ciddi  zədələnir.  

Artıq uzun müddətdirki, dövlətimiz  Moskvanın həm xalqımıza, həm də dövlətimizə qarşı davranışlarından narazıdır. Rusiya isə Bakıya təzyiq göstərmək məqsədilə Azərbaycan  üçün ən həssas nöqtə olan iqtisadi səbəblərlə Rusiyaya üz tutmuş Azərbaycan vətəndaşlarını hədəfə almağa çalışır. 

Yekaterinburqda azərbaycanlılara qarşı keçirilən polis əməliyyatı, iki nəfərin ölməsi və bir neçəsinin saxlanılması münasibətlərin daha da gərginləşməsinə səbəb oldu. Bu səbəbdən dövlətimiz tərəfindən Azərbaycanda Rusiyanın  mədəni tədbir və rəsmi səfərləri ləğv olunub. Əgər bu cür hadisələr və etnik azərbaycanlılara Rusiyada təzyiqlər davam edərsə, Azərbaycan hökumətinin növbəti addımı tam fərqli olacaqdır”.  

Deputat vurğulayıb ki, bütün hallarda bu gərginləşmə ilk növbədə sadə vətəndaşlara, xüsusilə Rusiyada yaşayan və ya Rusiya ilə ticarət edən azərbaycanlılara zərbə vura bilər:

“Əgər münasibətlər daha da soyuyarsa, gömrükdə yüklərin saxlanılması, ixracatçılara əlavə yoxlamalar, lisenziya və kvotalarla bağlı maneələr kimi inzibati əngəllər arta bilər. 

Həmçinin, Rusiyada yaşayan yüz minlərlə azərbaycanlının hüquqi və sosial vəziyyəti daha da çətinləşə bilər. 

Ümid edirəm ki, tezliklə Rusiya rəhbərliyi vəziyyətin vacibliyini nəzərə alaraq, münasibətlərin yaxşılaşması istiqamətində addım atacaqdır”.


Leyla Turan 
Demokrat.az
Seçilən
30
50
demokrat.az

10Mənbələr