"Növbəti günlər Ukrayna müdafiəsini sınağa çəkə bilər..."
ABŞ Prezidenti Donald Tramp və Rusiya lideri Vladimir Putinin avqustun 15-də Alyaskada planlaşdırılan görüşü öncəsi Donbas cəbhəsində vəziyyət kəskinləşib.
Moderator.az xəbər verir ki, bu barədə Amerikanın Müharibənin Öyrənilməsi İnstitutunun (ISW) hesabatında deyilir.
Açıq mənbələrdən məlumat toplayan analitiklər bildirir ki, Rusiya qüvvələri Donetsk vilayətində Ukraynanın əsas müdafiə xəttini yararaq, Pokrovskın şimalındakı Kuçerov Yar və Zolotoy Kolodez kəndlərinə daxil olub. Bu irəliləyiş Rusiya qoşunlarının Dobropolye, Kramatorsk və Slavyansk istiqamətində hücum imkanlarını genişləndirə bilər.
Mübahisəli qiymətləndirmə
Ukrayna tərəfi "ciddi irəliləyiş" iddialarını rədd edir. "Dnepr" əməliyyat-strateji qrupunun sözçüsü Viktor Trequbov deyib ki, bəzi kiçik düşmən qrupları (5-10 nəfər) arxa cəbhəyə sızmağa çalışır, lakin bu, onların keçdikləri ərazini tam nəzarətə aldıqları anlamına gəlmir.
Növbəti günlər həlledici ola bilər
ISW isə xəbərdarlıq edir ki, qarşıdakı günlər Ukraynanın Pokrovsk istiqamətində Rusiyanın sürətli irəliləyişini dayandırmaq qabiliyyəti üçün kritik olacaq. ISW-nin hesabatına görə, Rusiya qüvvələri Dobropolyenin cənub-şərqində də irəliləyib və Novoye Şaxovo, Novıy Donbass ətrafında döyüşlər davam edir. Hətta bəzi kəndlərin - Razino, Suxetskoye, Fyodorovka, Zapovednoye, Boykovka, Novotoretskoye, Mayak və Pankovkanın Rusiyanın nəzarətinə keçmiş ola biləcəyi ehtimal edilir.
Dron hücumları və logistika təzyiqi
Rusiya son həftələrdə Ukraynanın arxa cəbhə logistikasına intensiv dron zərbələri endirir. Xüsusən FPV dronlarla Dobropolye- Liman (T-0514) və Rodinskoye (T-0515) yollarında texnika və təchizat marşrutları hədəf alınır. Bu, Ukraynanı alternativ, daha uzun yollar istifadə etməyə məcbur edir və müdafiə imkanlarını zəiflədə bilər.
Putinin siyasi hədəfi
ISW analitikləri hesab edir ki, Moskva Dobropolye istiqamətindəki hərbi təzyiqi Alyaska görüşündən öncə informasiya effekti yaratmaq üçün gücləndirir. Putinin məqsədi Donetsk, Luqansk, Zaporojye və Xerson vilayətlərinin "qaçılmaz" şəkildə Rusiyanın nəzarətinə keçəcəyini göstərərək, Ukrayna və Qərbi güzəştlərə sövq etməkdir. Lakin ISW vurğulayır ki, bu dörd vilayətin tam işğalı nə qaçılmazdır, nə də yaxın perspektivdə real təhlükədir, xüsusən Donbasda Rusiya qoşunları ciddi operativ maneələrlə üzləşəcək və bu proses illərlə çəkə bilər.
Cəbhədə risklər
Ukrayna hərbçiləri bildirir ki, Rusiyanın Pokrovskla Konstantinovka arasındakı irəliləyişi bu yay kampaniyasında ən böyük düşmən uğurlarından biri hesab olunur və şəhərin şimaldan mühasirəyə düşməsi riskini yaradır. ISW-nin yekun qiymətləndirməsinə görə, növbəti bir neçə gün həm hərbi cəbhədə, həm də Alyaska danışıqlarının siyasi fonunda həlledici rol oynayacaq.
