Mark Flekken ən azı 2 aylıq sıradan çıxdı

Futbol üzrə Niderland milli komandasının və Leverkuzen “Bayer”inin (Almaniya) qapıçısı Mark Flekken uzun müddətə sıradan çıxıb.

Arena.az xəbər verir ki, 32 yaşlı qolkiper Almaniya Bundesliqası çərçivəsində “Hoffenhaym”a qarşı keçirdikləri və 0:1 hesabı ilə uduzduqları matçda zədələnib.

Tibbi müayinənin nəticələrinə əsasən, futbolçunun sağ dizinin yan bağlarında yırtıq aşkarlanıb. Bu səbəbdən təcrübəli qapıçının təxminən 2 ay meydanlardan kənar qalacağı bildirilir.

Xatırladaq ki, “Bayer” Mark Flekkeni 2025-ci ilin yayında 11 milyon avro müqabilində İngiltərənin “Brentford” klubundan transfer edib. Niderlandlı qolkiperin Almaniya klubu ilə müddəti 2028-ci ilin 30 iyununadək nəzərdə tutulmuş müqaviləsi mövcuddur. O, cari mövsümdə bütün turnirlər çərçivəsində 26 oyun keçirib, 39 qol buraxıb, 8 görüşdə qapısını toxunulmaz saxlayıb.

Flekken daha öncə “Brentford”, “Frayburq”, “Duysburq”, “Qroyter Fyurt”, “Alemanniya Aaxen” kimi klublarda da çıxış edib.

Təcrübəli qolkiper 2022-ci ilin mart ayında debüt etdiyi Niderland millisinin heyətində 10 oyuna çıxıb. O, bu görüşlərdə 8 qol buraxıb, 4 matçda qapısını toxunulmaz saxlamağı bacarıb.

“Transfermarkt” internet-portalı 32 yaşlı qapıçının transfer dəyərini 8 milyon avro məbləğində qiymətləndirir.