Nəşrin təhlilinə görə, Rəcəb Tayyib Ərdoğanın rəhbərliyi altında Ankara Yaxın Şərqdə əsas gücə çevrilməyə çalışır...
Poliqon xəbər verir ki, İsrailin baş naziri Benyamin Netanyahunun hökumətinə yaxınlığı ilə tanınan Israel Hayom qəzeti dərc etdiyi analitik materialda İranın artıq İsrail üçün əsas təhlükə olmadığını iddia edib. Nəşrin qənaətinə görə, hazırda İsrail üçün başlıca risk Türkiyə və onun prezidenti Rəcəb Tayyib Ərdoğanın apardığı regional siyasətdir.
Məqalədə vurğulanır ki, Ankara Yaxın Şərqdə təsir dairəsini təkcə hərbi vasitələrlə deyil, eyni zamanda siyasi və diplomatik alətlər hesabına genişləndirir. Qəzetin mənbələrinin bildirdiyinə görə, Türkiyə İsraili regional baxımdan “əhatə etməyə” cəhd göstərə və bununla da Təl-Əvivin təhlükəsizlik və manevr imkanlarını ciddi şəkildə məhdudlaşdıra bilər.
Israel Hayom yazır ki, növbəti 10 il ərzində Türkiyə Yaxın Şərqdə açar gücə çevrilməyi hədəfləyir. Bu kontekstdə Suriyada baş verən proseslər, Ankaranın artan rolu və təsir imkanları İsrail siyasi və təhlükəsizlik dairələrində ciddi narahatlıq doğurur. Nəşr qeyd edir ki, Suriyadakı hadisələr Türkiyənin regiondakı mövqelərini daha da möhkəmləndirməsinə şərait yaradır.
Təhlilin müəllifi, tanınmış israilli jurnalist Amit Seqal hesab edir ki, İsrail hakimiyyəti strateji baxışını yenidən nəzərdən keçirməlidir. Onun fikrincə, Təl-Əvivin təhlükəsizlik strategiyasında əsas fokus İran üzərindən Türkiyəyə yönəldilməlidir. Seqal vurğulayır ki, Ankaranın uzunmüddətli regional ambisiyaları İsrail üçün daha sistemli və davamlı çağırış yaradır.
Analitiklər bildirirlər ki, bu cür qiymətləndirmələr İsrailin regiondakı prioritetlərinin dəyişə biləcəyindən xəbər verir və gələcəkdə Təl-Əviv–Ankara münasibətlərində gərginliyin daha da artması ehtimalını gücləndirir.
Poliqon.info
