“Qarabağ”ın futbolçusu Musa Qurbanlı Sportinfo.az-a müsahibə verib.
Azərbaycan millisinin də şərəfini qoruyan hücumçu komandasının prinsipial qarşılaşmada 1:2 hesabı ilə uduzduğu oyundan sonra sualları cavablandırıb.
- 4 gün əvvəl 5:1 hesabı ilə udduğunuz rəqibə bu dəfə məğlub oldunuz. Nə dəyişdi ki?
- Futbolda belə hallar olur. Həmişə qalib gələcəyimizə dair qayda yoxdur. “Neftçi” bu gün çox istəkli idi. Sıx v ağıllı müdafiə olunmaqla yaxşı mübarizə apardılar. Mübarizə əzmində onlardan geri qaldığımızı düşünmürəm. Sadəcə onlarda alındı, bizdə nəsə çatmadı.
- Sizdə alınmadı, yoxsa “Neftçi” sizi daha yaxşı təhlil edərək lazım olan tədbirləri görmüşdü?
- Həm layiqli mübarizə apardılar, həm də oyunumuzu incələmişdilər. Fikrimcə, istəkli olmaları daha çox rol oynadı.
- 2-ci pillənin əldən çıxmasına dair narahatlıq var, yoxsa çempionatı indiki yerdə başa vuracağınızın rahatlığı var?
- Rahat heç nə yoxdur. İstəsək də, bu, mümkün deyil. Sona qədər mübarizə aparmalıyıq ki, yerimizi qoruyaq.
- Paltardəyişmə otağındakı ab-hava buna imkan verir?
- Pozitiv qalmağa çalışırıq. Ciddiyəti qorumalı, aqressivliyi artırmalıyıq. Bir az rahatlaşan kimi cəzalanırsan. Fərdi və komanda şəklində ciddiyəti qorumaqla maksimum mübarizə aparmalıyıq.
- Elvin Cəfərquliyevlə Abbas Hüseynov əsas komandadan uzaqlaşdırılıb. Hər iki futbolçu ilə dost münasibətində olduğunu bilirəm. Maraqlıdır, üzləşdikləri durumla bağlı nə deyirlər, nə düşünürlər?
- Bu mövzuda mənim nəsə deməyim düzgün deyil.
HƏBİB
