Ümumdünya Şəhərsalma Forumu 13 çərçivəsində Bakıda keçiriləcək “Bakı şəhərsalma həftəsi” Azərbaycanın urbanizasiya, dayanıqlı şəhər inkişafı və beynəlxalq şəhər idarəçiliyi gündəmində daha aktiv mövqe tutmağa çalışdığını göstərir. Dünyanın ən mühüm şəhərsalma platformalarından biri hesab olunan WUF-un Bakıda keçirilməsi paytaxtın regional urbanizasiya və infrastruktur müzakirələrinin əsas mərkəzlərindən birinə çevrilməsi baxımından strateji əhəmiyyət daşıyır.
BMT-nin şəhər inkişafı platforması olan WUF son illərdə qlobal urbanizasiya problemlərinin müzakirə olunduğu əsas beynəlxalq forumlardan biri kimi formalaşıb. Dünya əhalisinin sürətlə şəhərləşməsi, iqlim dəyişiklikləri, nəqliyyat sıxlığı və yaşayış infrastrukturuna təzyiqlər şəhərsalmanı iqtisadi inkişafın əsas istiqamətlərindən birinə çevirib. Hazırda qlobal əhalinin yarıdan çoxu şəhərlərdə yaşayır və bu göstəricinin növbəti onilliklərdə daha da artacağı proqnozlaşdırılır.
Bakıda “şəhərsalma həftəsi”nin təşkili yalnız forumöncəsi tədbir deyil, həm də şəhər inkişafı ilə bağlı yeni yanaşmaların təqdim olunduğu platforma kimi qiymətləndirilə bilər. Müasir şəhərsalma artıq yalnız tikinti və infrastruktur məsələsi deyil; rəqəmsal idarəetmə, yaşıl enerji, ağıllı nəqliyyat sistemləri, ekoloji balans və sosial inklüzivlik kimi komponentlər də bu siyasətin əsas hissəsinə çevrilib.
Son illərdə Bakı şəhərində həyata keçirilən infrastruktur layihələri, nəqliyyat şəbəkəsinin genişləndirilməsi və ictimai məkanların yenilənməsi urbanizasiya strategiyasının daha sistemli mərhələyə keçdiyini göstərir. Şəhərətrafı dəmir yolu layihələri, metro şəbəkəsinin inkişafı və yol infrastrukturuna yönələn investisiyalar paytaxtın artan əhali və mobillik tələblərinə uyğunlaşdırılması məqsədi daşıyır.
