Politoloq: "Rusiya öz müttəfiqlərinə vassal kimi baxmağı adət edib"

"Azərbaycanın Sverdlovskdakı hadisəyə lazımi qaydada sərt, amma obyektiv reaksiya verməsi ölkənin suveren hüquqları çərçivəsində edilməli olan hərəkətdir. Və aydındır ki, Rusiyanın hakimiyyət orqanları Azərbaycanın reaksiyasından məmnun qalmadılar. Çünki onlar Azərbaycanın buna susmasını, lazımi qədər reaksiya göstərməməsini istəyirdilər. Çünki Rusiya öz müttəfiqlərinə müttəfiq kimi yox, vassal kimi baxmağı adət edib".

Bu sözləri Demokrat.az-a açıqlamasında politoloq Aydın Quliyev deyib.

O bildirib ki, ancaq bu, üzərindən sükutla keçiləsi məsələ deyil:

"Azərbaycan Rusiyanın daxili işlərinə də müdaxilə etmədən öz soydaşlarının qanun çərçivəsində hüquqlarını müdafiə edir. Çünki Azərbaycanın vətəndaşlarının və bizim soydaşlarımızın Rusiyada fəaliyyəti, Rusiyanın qanunvericilik çərçivəsində olmaqla yanaşı, həm də Azərbaycan dövlətinin himayəsi altında olan bir yaşamdır. Və biz heç bir halda Rusiyanın daxili işlərinə müdaxilə etmirik".

Politoloqun sözlərinə görə, Azərbaycanın reaksiyasında Rusiyanın daxili işlərinə zərrə qədər belə müdaxilə əlaməti yoxdur:

"Azərbaycanın iddiası bundan ibarətdir ki, ölkədə cinayətkarlığa qarşı mübarizə cinayətkarın fiziki cəhətdən məhv edilməsi ilə yox, qanun çərçivəsində aparılmalıdır. Faktiki olaraq Rusiyanın hüquq-mühafizə orqanlarının apardıqları əməliyyat cinayətdə şübhəli şəxslərin zərərsizləşdirilməsi yox, fiziki məhv edilməsi əməliyyatı idi ki, bu da dünyanın beynəlxalq və milli qanunvericilik normalarına qətiyyən uyğun olmayan bir haldır.

Faktiki olaraq "cinayətkarlığa qarşı guya mübarizə" adı altında insanlar qətlə yetirilib. Bu, yol verilməzdir. Və Rusiyanın hakimiyyət orqanları buna aydınlıq gətirməlidirlər".

Əfsanə Kamal
Demokrat.az

Politoloq: "Rusiya öz müttəfiqlərinə vassal kimi baxmağı adət edib"

Sign in to your account

Sign up

Şifrəni bərpa et