Vüqar Talıbov Zaqrebdə 3-cü oldu

Azərbaycan cüdoçusu Vüqar Talıbov Xorvatiyanın paytaxtında təşkil edilmiş Zaqreb qran-prisində bürünc medal qazanıb.

Arena.az xəbər verir ki, bu gün Zaqreb qran-prisinə yekun vurulub.

Sonuncu yarış günündə 3 çəki dərəcəsində 5 cüdoçumuz tatamiyə çıxıb. Təəssüf ki, onların əksərinin çıxışı uğursuz alınıb.

İdmançılarımızdan yalnız Vüqar Talıbov (-90 kq) fəxri kürsünün üçüncü pilləsinə qalxmağı bacarıb. O, üçüncü yer uğrunda görüşdə komanda yoldaşı Aslan Kotsoyevə qalib gələrək Zaqreb qran-prisində bürünc mükafatın sahibi olub.

Aslan Kotsoyevlə yanaşı, sonuncu yarış günündə tatami üzərinə çıxmış millimizin digər üzvlərindən Əjdər Bağırov (-100 kq), Camal Qamzatxanov və Kənan Nəsibov (hər ikisi +100 kq) da medalsız qalıblar.

Xatırladaq ki, Azərbaycan Xorvatiyadakı yarışa bütövlükdə 15 cüdoçu ilə qatılmışdı. Daha öncə yığmamızın digər üzvü Hüseyn Allahyarov (60 kq) da Zaqrebdə bürünc medal qazanmışdı.

Xəbəri istədiklərinizlə paylaşın