Hazırda “Deyv” fırtınası Şimali Atlantika üzərində güclənir.
“İki sahil” xəbər verir ki, İrlandiya, Britaniya adaları, Norveç və İsveç üçün artıq şiddətli hava xəbərdarlıqları verilib.
Britaniya adalarında fırtına artıq Pasxa bayramı planlarını pozub. “Deyv”in şənbə günü günortadan sonra sahilə çatacağı, daha sonra Şotlandiya və Şimali İngiltərədən keçərək Skandinaviyaya doğru yönələcəyi gözlənilir.
İrlandiyanın və Böyük Britaniyanın bir çox bölgəsində hakimiyyət orqanları sakinləri evdə qalmağa çağırır, Bir sıra tədbirlər artıq ləğv edilib. Güclü küləklərin nəqliyyatın hərəkətinə ciddi təhlükə yaradacağı səbəbindən avtomobil idarə etmək də tövsiyə olunmur. Küləyin sürətinin saniyədə 30 metrdən çox olacağı proqnozlaşdırılır.
Pasxa bayramında - bazar günü fırtına Norveç və İsveçə çatacaq. O vaxta qədər onun zəifləməsi ehtimalı var, lakin hər iki ölkənin hakimiyyət orqanları güclü küləklər və əlverişsiz yol şəraiti barədə də xəbərdarlıq edir.
“Deyv” bazar ertəsi günü Finlandiyaya xeyli zəifləmiş şəkildə çatacaq. Hazırda xəbərdarlıqlar cənub dəniz ərazilərində güclü küləklərlə bağlıdır. Materik üçün hələlik fırtına xəbərdarlığı yoxdur, lakin bazar və bazar ertəsi günləri qar və buzlaq səbəbindən hava şəraiti daha da pisləşə bilər.
