PSJ-nin 55 yaşlı ispan baş məşqçisi Luis Enrike dünya futbol tarixinin ən yaxşı futbolçusu haqqında qənaətini açıqlayıb.
Arena.az “All About Argentina” dərgisinə istinadən, ispan mütəxəssisin müvafiq açıqlamasını təqdim edir:
“Mənim üçün, heç şübhəsiz, Lionel Messi – tarixdə ən yaxşı futbolçudur. Onun karyerasının zirvəsi 10-15 ildir ki, davam edir, o, tarixin ən görkəmli oyunçusuna bir ölçüdür. Onun uzun illər ərzindəki uzunömürlüyü, hər üç gündən bir yüksək səviyyədə çıxışı – təsirləndiricidir. Mən Messinin məşqlərdə elə şeylər etdiyini görmüşəm ki, bunlar başqaları ilə müqayisədə başqa bir səviyyədədirlər, inanılmaz şeylərdir”, deyə Luis Enrike vurğulayıb.
Xatırladaq ki, Lionel Messi Luis Enrikenin rəhbərliyi altında “Barselona”da çıxış edib.
Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
“Leo” cari mövsümdə 23 oyuna 16 qol və 6 məhsuldar ötürmə ilə fərqlənib.
Argentinalı ulduzun “İnter Mayami” karyerası ümumilikdə 62 oyun, 50 qol və 24 məhsuldar ötürmədən ibarətdir. Messi “vağlar”ın tarixinin ən sərrast qolçusudur.
Ulduz hücumçu ötən il Mayami təmsilçisi ilə Liqalar kubokunu qazanıb, həmçinin ötən mövsüm “İnter Mayami”nin heyətində MLS-in Şərq Konfransının qalibi olub. Müvafiq qənimət “Leo”nun futbolçu karyerası ərzində qazandığı 46-cı qənimətdir. Əlavə edək ki, Messi futbol tarixində ən çox qənimət qazanmış oyunçudur.
Lionel Messi hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 193 oyun keçirib, 112 qol vurub və 61 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
