BAKI, 12 avqust. TELEQRAF
NATO-nun baş katibi Mark Rütte ABŞ , Avropa və Ukrayna liderlərinin Ukrayna münaqişəsinin müzakirəsinə həsr olunmuş telekonfransında iştirak edəcək.
Teleqraf xəbər verir ki, bu barədə Şimali Atlantika Alyansının bəyanatında deyilir.
"Rutte Ukraynadakı vəziyyəti müzakirə etmək üçün Almaniya kansleri Fridrix Merz tərəfindən təşkil edilən Avropa, ABŞ və Ukrayna liderlərinin virtual görüşlərində iştirak edəcək", - NATO bildirib.
Telekörpü avqustun 13-də, Rusiya və ABŞ prezidentləri Vladimir Putin və Donald Trampın Alyaska görüşündən iki gün əvvəl baş tutacaq. Tədbirdə Ukrayna lideri Volodimir Zelenski, ABŞ Prezidenti Donald Tramp, ABŞ vitse-prezidenti J.D.Vens, Almaniya kansleri Fridrix Merz, Fransa Prezidenti Emmanuel Makron, Böyük Britaniyanın Baş naziri Key Starmer, həmçinin İtaliya, Polşa və Finlandiya hökumət rəhbərləri iştirak edəcəklər.
Almaniya kanslerinin mətbuat katibi Stefan Korneliusun sözlərinə görə, konfrans iştirakçıları Rusiyaya təzyiq göstərmək üçün gələcək variantları nəzərdən keçirəcəklər. Bundan əlavə, ölkə liderləri mümkün sülh danışıqlarının hazırlanması məsələsini qaldıracaq, ərazi güzəştləri və təhlükəsizlik mövzusunu müzakirə edəcəklər.
