"Qaliley gölündə baş verən hadisələr yeni işıq altında..."
Alimlər iki məşhur İncil möcüzəsinə - "çörək və balıqların çoxaldılması" ilə "möcüzəvi balıq ovu"na elmi izah tapdıqlarını açıqlayıb.
Moderator.az xəbər verir ki, bu barədə "The Mirror" nəşri yazıb.
Onların araşdırmasına görə, bu hadisələrin hər ikisi Qaliley dənizində (müasir İsraildə Kinneret gölü) baş verib və təbii iqlim prosesləri ilə əlaqəli ola bilər.
Beş çörək və iki balıq - elm möcüzəyə necə yanaşır?
Matta İncilində təsvir olunur ki, İsa Məsih yalnız beş çörək və iki balıqla təxminən 5 min nəfəri doyurub. Alimlərin fikrincə, həmin dövrdə göldə oksigen çatışmazlığı nəticəsində kütləvi balıq ölümləri baş verib.
Güclü küləklər suyun dərin qatlarını hərəkətə gətirərək oksigeni azaldıb, nəticədə balıqlar boğularaq üzə çıxıb. Bu isə böyük miqdarda balıq toplamağa imkan yaradıb və İncil hekayələrinin "möcüzəvi" təsvirinə uyğun şərait formalaşdırıb.
Gizli səbəb - göldə daxili dalğalar
Araşdırmaya görə, Qaliley gölü təbəqələşmiş quruluşa malikdir: üst qat isti və oksigenlə zəngindir, alt qat isə soyuq və oksigensizdir. Qərb küləyi əsəndə üst qat şərqə sıxışdırılır, qərbdə isə alt qatlardan oksigensiz su yuxarı qalxır. Bu, "daxili dalğa" deyilən təbiət hadisəsini yaradır.
Son illərdə oxşar hadisələr başqa su hövzələrində də müşahidə olunub. Məsələn, Tsalmondakı limanda aparılan 3D modelləşdirmə zamanı balıq kütlələrinin məhz belə səbəblərdən məhv olduğu sübut edilib. İqlim araşdırmaçısı Ehud Strobax göldə 3D simulyasiya apararaq, həmin dalğaların və oksigensiz suyun qalxmasının balıq ölümlərinə səbəb olduğunu göstərib.
Möcüzələrin vaxtı - yazın sonu, yayın əvvəli
Tədqiqatçılar bildirir ki, bu hadisələr çox güman yazın sonu və yayın əvvəlində - suyun temperaturu kəskin dəyişəndə baş verib. Həmin dövrdə gölün səthinə daha çox ölü balıq çıxır, bu isə İncil möcüzələrinin reallıqla bağlı yeni izahını ortaya qoyur.
Elm hələ də İsa Məsihin hekayələrinə tam cavab verə bilməsə də, yeni kəşflər qədim dini mətnlərdəki təsvirləri təbii hadisələrlə əlaqələndirərək möcüzələrin "elmi izahını" təqdim edir.
