Brüssel bu həftəsonu Moskvaya qarşı əlavə məhdudiyyətlər paketi təqdim etməyi planlaşdırır...
Poliqon xəbər verir ki, Avropa İttifaqı yaxın günlərdə Rusiyaya qarşı növbəti sanksiyalar paketini açıqlamağa hazırlaşır. Bloomberg-in məlumatına görə, Avropa Komissiyası cümə günü üzv ölkələrə yeni məhdudiyyətlər paketini təqdim edəcək. Bu qərarın ABŞ prezidenti Donald Tramp və Avropa Komissiyasının sədri Ursula fon der Lyayen arasında keçirilmiş telefon danışığından sonra elan olunacağı gözlənilir.
Məlumata görə, Brüssel bu dəfəki sanksiyalar paketində həm iqtisadi, həm də texnoloji sahələri əhatə edən məhdudiyyətlər üzərində işləyir. Məqsəd Rusiyanın Ukraynaya qarşı davam edən hərbi əməliyyatlarını zəiflətmək və Moskvanın Qərb bazarlarına çıxış imkanlarını məhdudlaşdırmaqdır.
Diplomatik mənbələr bildirirlər ki, yeni sanksiyalar Rusiyanın maliyyə sektorunu, strateji sənaye sahələrini və enerji ixracına bağlı şirkətləri hədəfə ala bilər. Bundan əlavə, Kremlə yaxın bəzi fərdlərə və şirkətlərə qarşı aktivlərin dondurulması və viza qadağalarının tətbiqi də gündəmdədir.
Ekspertlər hesab edirlər ki, Aİ ilə ABŞ arasında bu məsələdə koordinasiyanın güclənməsi Qərbin Moskvaya təzyiq strategiyasının mühüm tərkib hissəsidir. Tramp–Fon der Lyayen telefon danışığının məhz yeni məhdudiyyətlərin detalları ilə bağlı aparıldığı da vurğulanır.
Poliqon.info
