Ukraynanın pilotsuz uçuş aparatları ilə həyata keçirdiyi hücumlar Rusiyanın Yaxın Şərqdəki müharibə fonunda artan neft qiymətlərindən tam faydalanmasına mane olur və ölkənin hava hücumundan müdafiə sistemində zəiflikləri üzə çıxarır...
Poliqon xəbər verir ki, bu barədə Financial Times yazır.
Nəşr qeyd edir ki, Brent markalı neftin qiyməti 100 dollardan yuxarı olsa da, Baltik dənizində yerləşən iki əsas ixrac nöqtəsinə hücumlar Kremlin gəlirlərini azalda bilər.
Kiyev İqtisadiyyat Məktəbinin enerji və iqlim üzrə rəhbəri Boris Dodonovun sözlərinə görə, Primorsk və Ust-Luqaya qarşı həyata keçirilən beş hücum martın 20-dək olan bir həftə ərzində rus enerji ixracatçılarına təxminən 970 milyon dollar itirilmiş gəlirə səbəb olub.
Bu iki liman Rusiyanın dəniz yolu ilə xam neft ixrac gücünün 40 faizindən çoxunu təşkil edir. Yalnız Primorskda hücumlar nəticəsində təxminən 200 milyon dollar dəyərində neft yanıb.
"Seala AI" analitiki Vladimir Nikitinin sözlərinə görə, terminalların fəaliyyəti bir neçə gün ərzində bərpa oluna bilər, lakin yanmış rezervuarların tam bərpası aylarla çəkə bilər. Ust-Luqadakı “Novatek” terminalında texnoloji xətlərin təmiri isə bir aydan çox davam edə bilər.
Leninqrad vilayətinin qubernatoru Aleksandr Drozdenko vəziyyətin "mürəkkəb olaraq qaldığını" və "düşmən PUA-larının misli görünməmiş hücumlarının intensivliyinin azalacağına dair proqnoz olmadığını" bildirib.
Mənbələrin bildirdiyinə görə, son hücum dalğası Ukraynanın uzaqmənzilli pilotsuz aparat texnologiyalarında Rusiyanı geridə qoyduğunu göstərir. Bu, Rusiyanın Ukraynadakı dron istehsalçılarına davamlı zərbələr endirməsinə baxmayaraq baş verir.
"Əgər Ukrayna müntəzəm olaraq qanadlı və ballistik raketlərdən istifadə etməyə başlasa, Rusiya tərəfi daha böyük zərər görəcək", deyə nəşrin həmsöhbəti bildirib.
Rusiya çoxsəviyyəli müdafiə sistemi qurub: radioelektron mübarizə vasitələri, fiziki maneələr və hətta ehtiyat qüvvələr. Lakin bu tədbirlər Ukraynanın dron texnologiyalarındakı inkişafını dayandırmaq üçün kifayət etmir.
Belə ki, "Rosneft" kimi iri şirkətlər aşağı hündürlükdə uçan dronları zərərsizləşdirmək üçün radioelektron sistemlərə malikdir. Lakin Ukraynanın proqramlaşdırılmış marşrut üzrə radioəlaqəsiz uçan yeni dron modellərinə qarşı bu vasitələr demək olar ki, təsirsizdir.
2025-ci ilin noyabrında Vladimir Putin "kritik əhəmiyyətli" obyektlərin müdafiəsi üçün ehtiyat qüvvələrin cəlb olunmasına icazə verən qanun imzalayıb. Lakin bəzi rus iş adamları bu addımı effektiv hesab etmir.
"Ehtiyat qüvvələrdən nə fayda var?.. Biz zavodlarımızın üzərində qüllələr qurub tor çəkdik və hamısını öz vəsaitimiz hesabına etdik. Moskva bizə heç nə vermədi", deyə yüksək vəzifəli biznes nümayəndəsi bildirib. Onun sözlərinə görə, bu tədbirlərə ən azı 1,5 milyard rubl (19,1 milyon dollar) xərclənib.
Bundan əvvəl Prezident Ofisinin rəhbəri Kirilo Budanov bildirib ki, bəzi xarici tərəfdaşlar neft qiymətlərinin kəskin artımı fonunda Ukraynadan Rusiya neft obyektlərinə hücumları azaltmağı xahiş ediblər. Bununla yanaşı, The Telegraph yazır ki, Ukrayna Qərb müttəfiqlərinin bu çağırışlarını nəzərə almamağa qərar verib.
Poliqon.info
