Beynəlxalq Valyuta Fondunun hesabatında bildirilir ki, İranla müharibə fonunda Yaxın Şərqdə yaranan yeni gərginlik qlobal iqtisadi proqnozlarda gözlənilən yaxşılaşmanı pozub, enerji böhranı riskini isə daha da artırıb...
Poliqon xəbər verir ki, Beynəlxalq Valyuta Fondu (BVF) İranla müharibənin dünya iqtisadiyyatının artım tempinə ciddi zərbə vurduğunu və qlobal inflyasiya təzyiqlərini gücləndirdiyini bəyan edib. Təşkilatın yeni World Economic Outlook hesabatında qeyd olunur ki, Yaxın Şərqdəki münaqişə qlobal iqtisadiyyat üçün gözlənilən müsbət dinamikanı dayandırıb.
BVF-nin baş iqtisadçısı Pyer-Olivye Qurinşa bildirib ki, müharibə “iqtisadi impulsu dayandırıb”. Onun sözlərinə görə, Hörmüz boğazının bağlanması və enerji infrastrukturuna endirilən zərbələr genişmiqyaslı enerji böhranı riski yaradır və bu proses dünya bazarlarında yeni qeyri-sabitlik ocaqları formalaşdırır.
Fond 2026-cı il üzrə qlobal iqtisadi artım proqnozunu əvvəlki 3,4 faizdən 3,1 faizə endirib. Eyni zamanda, qlobal inflyasiya ilə bağlı proqnoz 4,4 faizə qaldırılıb ki, bu da yanvar qiymətləndirməsi ilə müqayisədə 0,6 faiz bəndi yüksəkdir.
Hesabatda vurğulanır ki, vəziyyət daha da pisləşərsə, dünya iqtisadiyyatının artım tempi 2,5 faizə, hətta 2 faizə qədər zəifləyə bilər. Bu halda inflyasiyanın da 6 faizə yaxınlaşacağı istisna edilmir. BVF hesab edir ki, belə ssenari qlobal iqtisadi sabitlik üçün daha ciddi və uzunmüddətli təhdid yarada bilər.
Sənəddə qeyd olunur ki, münaqişə artıq təchizat zəncirlərində ciddi pozuntulara səbəb olub. Hörmüz boğazından milyonlarla barel neftin daşınmasının dayanması ilə yanaşı, gübrə və helium kimi strateji əhəmiyyət daşıyan resursların daşınmasında da fasilələr yaranıb. Bu isə həm sənaye, həm kənd təsərrüfatı, həm də enerji bazarları üzərində təzyiqi daha da artırır.
BVF-nin qiymətləndirməsinə görə, Yaxın Şərqdə davam edən müharibə təkcə regional deyil, qlobal iqtisadi böhran riskini də gücləndirir. Mövcud vəziyyətin uzanması halında dünya bazarlarında qiymət təzyiqlərinin daha da dərinləşməsi, logistika zəncirlərində pozuntuların artması və iqtisadi artımın daha da zəifləməsi ehtimalı yüksələcək.
Poliqon.info
