Binəqədi Rayon Məhkəməsində dələduzluqda təqsirləndirilən Fəqan Bayramovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Samir Nəsibovun sədrliyi ilə keçirilən prosesdə hökm oxunub.
Məhkəmənin hökmü ilə “Konstitusiya və Suverenlik İli” münasibətilə amnistiya elan edilməsi haqqında” Milli Məclisin 2025-ci il 19 dekabr tarixli qərarının 1.14-cü bəndi tətbiq edilməklə təqsirləndirilən şəxs Cinayət Məcəlləsinin 178.2.2 və 178.2.4-cü maddələri ilə cinayət məsuliyyətindən azad olunub və cinayət işi üzrə icraata xitam verilib. Fəqan Bayramov barəsində seçilmiş başqa yerə getməmək haqqında iltizam qətimkan tədbiri ləğv edilib.
İttihama əsasən, Fəqan Bayramov vətəndaşlara yüksək vəzifəli şəxslərlə əlaqələrinin olması barədə yalan vədlər verməklə onların etibarından sui-istifadə edib və külli miqdarda pul vəsaitini ələ keçirib.
Belə ki, o, tamah niyyəti ilə hərəkət edərək zərərçəkmiş Mahirə Hacıyevanın (adı, soyadı şərtidir) həyat yoldaşının Cinayət Məcəlləsinin 234.4.1 və 234.4.3-cü maddələri ilə təqsirləndirildiyi və Bakı Ağır Cinayətlər Məhkəməsi icraatında olan cinayət işi üzrə daha yüngül – aşağı həddə azadlıqdan məhrum etmə cəzası almasına köməklik göstərə biləcəyini bildirib. Bu məqsədlə yüksək vəzifəli şəxslərlə yaxın münasibətlərinin olduğunu iddia edərək zərərçəkmiş şəxsi aldadıb.
Beləliklə, təqsirləndirilən şəxs həmin adından ümumilikdə 26 000 manat məbləğində xeyli miqdarda maddi ziyan vurulub.
İttiham aktında qeyd olunur ki, Fəqan Bayramov bununla kifayətlənməyərək analoji əməlləri digər şəxsə münasibətdə də törədib.
Belə ki, o, zərərçəkmiş Davud İbayevin (adı, soyadı şərtidir) barəsində Səbail Rayon Polis İdarəsi İstintaq şöbəsində Cinayət Məcəlləsinin 178.3.2-ci maddəsi ilə aparılan cinayət işinin xitam olunmasına köməklik göstərəcəyini vəd edərək yenidən özünü nüfuzlu əlaqələrə malik şəxs kimi təqdim edib.
Bu yalan vədlərlə zərərçəkmiş şəxsin etibarını qazanan təqsirləndirilən şəxs 2024-cü ildə ümumilikdə 2 500 manat məbləğində maddi ziyan vurulduğu müəyyən edilib.
İstintaq orqanının qənaətinə görə, təqsirləndirilən şəxs qeyd olunan əməlləri vahid niyyətlə, təkrar törətməklə həyata keçirərək zərərçəkmiş şəxslərin əmlakını ələ keçirib.
Qeyd: Fəqan Bayramov zərərçəkmiş Mahirə Hacıyevanın keçmiş ərinin dostu olub.
Kamal Məmmədov
