Ekspertlər qeyri-müəyyənlik və eskalasiya riskinin artdığını bildiriblər...
Poliqon xəbər verir ki, Bloomberg Agentliyinin məlumatına görə, ABŞ prezidenti Donald Tramp tərəfindən irəli sürülən Hörmüz boğazı ilə bağlı plan gəmi sahibləri və dəniz daşımaları sektorunda fəaliyyət göstərən şirkətlər arasında ciddi suallar doğurub.
Agentliyin əlaqə saxladığı bir sıra gəmi sahibləri və gəmi idarəçiləri bildiriblər ki, planın praktik tətbiqi üçün daha konkret detallar və təhlükəsizlik zəmanətləri tələb olunur. Xüsusilə, əsas narahatlıq doğuran məsələlər sırasında dəniz minaları təhlükəsi və İran tərəfindən mümkün hücum riskləri qeyd olunub.
Mütəxəssislər vurğulayır ki, hazırkı qeyri-müəyyənlik şəraitində kommersiya gəmilərinin hərəkəti ilə bağlı qərar qəbul etmək çətinləşib və bu, qlobal ticarət marşrutlarına mənfi təsir göstərə bilər. Hindistan Dəniz Fondunun vitse-prezidenti Anil Cey Sinqh isə bildirib ki, Trampın açıqlamaları əksinə, gözlənilməz eskalasiya riskini artırır.
Onun sözlərinə görə, belə həssas və strateji əhəmiyyətə malik Hörmüz boğazı ilə bağlı qeyri-müəyyən və detalları açıqlanmayan təşəbbüslər regionda onsuz da gərgin olan vəziyyəti daha da mürəkkəbləşdirə bilər.
Analitiklər hesab edir ki, beynəlxalq dəniz daşımaları şirkətləri üçün əsas prioritet təhlükəsizlik təminatlarıdır və bu təminatlar olmadan belə planların həyata keçirilməsi ciddi risklər yaradır. Mövcud vəziyyət isə enerji bazarlarına və qlobal logistika zəncirinə birbaşa təsir göstərə biləcək yeni qeyri-sabitlik dalğası yarada bilər.
Poliqon.info
