Balakən Mədəniyyət Mərkəzi nəzdində fəaliyyət göstərən teatr trubbası yeni bir layihəyə imza atıblar.
Bizim.Media-nın yerli bürosu xəbər verir ki, Mədəniyyət Mərkəzində Ümummilli Lider Heydər Əliyevin anadan olmasının 103-cü ildönümü münasibətilə İlyas Əfəndiyevin “Hökmdar və qızı” pyesi əsasında hazırlanmış “Qarabağnamə” tamaşası nümayiş olunub.
İştirakçılar əvvəlcə Mədəniyyət Mərkəzinin foyesində Ulu Öndər Heydər Əliyevin həyat və fəaliyyətinə həsr edilmiş kitab sərgisi ilə tanış olublar. Tamaşanın təqdimatında Ulu Öndər Heydər Əliyevin Azərbaycan mədəniyyətinin inkişafında, milli-mənəvi dəyərlərimizin qorunub yaşadılmasındakı xidmətlərindən bəhs edilib.
Bildirilib ki, “Qarabağnamə” tamaşası Qarabağ həqiqətlərinin təbliği, dünyaya çatdırılması, ibrətamiz həqiqətlərlə dolu tariximizin öyrənilməsi baxımından mühüm əhəmiyyət daşıyır.
Mədəniyyət işçilərinin və həvəskar aktyorların canlandırdıqları obrazlar tamaşaçılar tərəfindən böyük maraq və rəğbətlə qarşılanıb.
Tamaşanın sonunda Heydər Əliyevin “Qarabağnamə” tamaşası haqqında fikirlərinin yer aldığı videoçarx nümayiş etdirilib.
Tural Rasimoğlu, Bizim.Media, Şimal-Qərb bürosu
