"Apple" şirkəti "iPhone 16 Pro" modelindəki prosessorla işləyəcək yeni və büdcə dostu "MacBook" üzərində işləyir.
HİT.az xəbər verir ki, bu barədə tanınmış sənaye analitiki Minq Çi-Kuo məlumat yayıb.
Yeni noutbukda A18 Pro çipi istifadə olunacaq və cihazın qiyməti 1000 ABŞ dollarından ucuz olacaq. Kütləvi istehsalın 2025-ci ilin sonlarında və ya 2026-cı ilin əvvəlində başlaması planlaşdırılır. Analitikə görə, bu addım "Apple"ın COVID-19 dövründəki satış səviyyəsinə geri dönmək cəhdidir.
Kuonun proqnozlarına əsasən, bu yeni "MacBook" modeli 2026-cı ildə 5–7 milyon ədəd satıla bilər. Bu, "Apple" üçün əhəmiyyətli bir bazar genişlənməsi deməkdir.
Texniki xüsusiyyətlər və dizayn
Yeni modelin:
* 13 düymlük ekranla təchiz ediləcəyi,
* dizayn baxımından MacBook Air-ə bənzəyəcəyi,
* korpus rənglərinin isə gümüşü, mavi, çəhrayı və sarı olacağı gözlənilir.
Hazırda "Apple" kataloqunda ən ucuz "MacBook" modeli 999 dollar qiyməti ilə satılır. Yeni cihazın ondan da ucuz olması, məhsulun daha geniş auditoriyaya çatmasını təmin edə bilər.
"AnTuTu" reytinqlərinə əsasən, "iPhone 16 Pro" modeli ilə gələcək A18 Pro çipi performans baxımından M1 çipi ilə müqayisə oluna bilər və iPad Air M2 modelindən bir qədər geri qalır. Bu isə o deməkdir ki, A18 Pro çipi "M" seriyalı çiplərə yaxın səviyyədə güc təqdim edir və gündəlik istifadə üçün yetərincə məhsuldardır.
Bu arada, "Apple" sentyabr ayı üçün təqdimata hazırlaşır. Tədbirdə yeni "iPhone", "Apple Watch", "AirPods Pro" və çox güman ki, M5 çipi ilə təchiz edilmiş iPad Pro təqdim olunacaq.
Qeyd edək ki, WWDC 2025 konfransında "Apple" gözlənilənin əksinə olaraq iOS 19 deyil, tamamilə yenilənmiş şüşə dizaynlı iOS 26 sistemini təqdim edib. Şirkət bu yeniliyi son 11 ilin ən böyük iOS dəyişiklikləri sırasında qiymətləndirib.
Samir
