Türkmanlar bu qərara etiraz edir - Ekspert

İyunun 30-da Kərkükə bağlı Altunköprü qəsəbəsinə yeni bələdiyyə sədri təyin edildi. Əhalisinin böyük əksəriyyəti türkmanlardan ibarət olan böyük bir qəsəbəyə kürd rəhbərin təyin olunması yerli türklərin haqlı narazılığına səbəb oldu. Artıq 4 gündür ki, türkmanlar bu qərara etiraz edir və rəsmi Bağdadın məsələyə müdaxilə edəcəyini gözləyirlər. Etirazçılar qərarın dəyişməsini və qəsəbənin idarəsində türkmanlara da yer verilməsini tələb edirlər.

Məsələyə münasibət bildirən ekspert Orxan İsayev XəzərNews.az-a bildirib ki, tarixən türk məskəni olan Altunköprüdə türkmanların yox sayılması və onlardan xəbərsiz rəhbər vəzifələrə kürdlərin gətirilməsi uzun illərdir Türkmanelinin kürdləşdirmə siyasətinin bir hissəsidir:

"Bir neçə il bundan öncə İraq türkmanlarının siyasi və mədəni mərkəzi hesab olunan Kərkük valisi vəzifəsinə də Bağdadda bir otelin qaranlıq otağında tez-tələsik və gizli şəkildə kürd millətindən olan bir şəxs təyin edilmişdir. Türkmanlar, əsasən də İraq Türkman Cəbhəsi Partiyası bu qərarı baykot etmiş və yeni valini tanımadığını açıqlamışdır. Partiyanın rəhbərliyi Altunköprüdə yeni bələdiyyə sədrinin təyin olunmasını kürdləşdirmə siyasətinin bir hissəsi hesab edir və noyabrda keçiriləcək parlament seçkilərinə "hazırlıq" kimi qiymətləndirir".

Xəbər 3 dəfə oxunub.