Bədəvilər Əs-Suveydədən təxliyə olunur | VİDEO

AzVision.az “Suriya.tv” portalına istinadən xəbər verir ki, 300-ə yaxın insan avtobuslarla Dəra vilayətinin şərqində yerləşən Busra əl-Hərir şəhərinə aparılıb.

“Təxliyə asayişi və mülki əhalinin mühafizəsini təmin edən əməliyyat Daxili Təhlükəsizlik qüvvələrinin ciddi nəzarəti altında keçirilib. Prosesi əlaqələndirmək üçün təhlükəsizlik qüvvələrinin yüksək rütbəli nümayəndələri şəxsən iştirak ediblər: Əs-Suveyda əyalətinin Daxili Təhlükəsizlik komandiri, briqada generalı Əhməd əl-Dəlati və Dəraadan olan briqada generalı Şaher Omran”, - xəbərdə deyilir.

Təxliyə Əs-Suveyda ərazisini tərk etmək istəyən bütün mülki şəxslərin münaqişə zonasını təhlükəsiz şəkildə tərk etməsinə imkan verən daha əvvəl əldə olunmuş razılaşmanın nəticəsi idi. Bu razılaşmanı general əl-Dəlati təsdiqləyib və o, humanitar səylər çərçivəsində mülki şəxslərin təxliyəsi prosesinin davam etdiriləcəyini vurğulayıb.

Nəşr vurğulayır ki, bədəvi ailələrinin təxliyəsi gərginliyi azaltmaq və vəziyyətin son dərəcə qeyri-sabit qaldığı bölgəyə humanitar yardım gətirmək üçün gələcək addımlar üçün presedent yarada bilər.

Xatırladaq ki, iyulun 14-də Suriyanın Əs-Suveyd əyalətində hökumət qüvvələri ilə druzlar arasında baş verən toqquşmalar başayandan bəri artıq yüzlərlə insan həlak olub.


Sahil İsgəndərov
AzVision.az