BAKI, 4 yanvar. TELEQRAF
Entoni Coşuanın sürücüsü Nigeriyada ölümə səbəb olan qəza ilə bağlı ittiham olunub.
Teleqraf xəbər verir ki, Nigeriya polisi britaniyalı boksçu Entoni Coşuanın sürücüsünü iki nəfərin ölümü ilə nəticələnən yol-nəqliyyat hadisəsi ilə bağlı təhlükəli sürücülükdə ittiham edib.
Məlumata görə, 46 yaşlı Adeniyi Mobolaji Kayode ehtiyatsız və təhlükəli sürücülük nəticəsində ölümə səbəb olmaqda, etibarlı sürücülük vəsiqəsi olmadan avtomobil idarə etməkdə, həmçinin diqqətsizlik ucbatından sağlamlığa zərər vurmaqda və əmlaka ziyan yetirməkdə günahlandırılır. O, yanvarın 20-də məhkəmə qarşısına çıxarılacaq.
Nigeriyanın Federal Yol Təhlükəsizliyi Korpusu avtomobilin icazə verilən sürət həddini aşdığını bildirib.
Hadisə dekabrın 29-da Nigeriyanın cənub-qərbində, Lagos-İbadan magistral yolunda baş verib. Kayode avtomobildə Entoni Coşua, onun şəxsi məşqçisi Latif Ayodele* və güc üzrə məşqçi Sina Ghami ilə birlikdə hərəkətdə olub.
Yüksək sürətlə gedən “Lexus” markalı yolsuzluq avtomobili ötmə manevri zamanı sərnişin tərəfində təkərin partlaması nəticəsində yol kənarında qanunsuz saxlanılmış, soya paxlası daşıyan yük maşınına çırpılıb. Qəza nəticəsində hər ikisi 36 yaşında olan Ayodele və Ghami hadisə yerində həyatını itirib.
Uzun illər Coşuanın komandasında çalışan sürücü 5 milyon naira (təxminən 2 580 funt sterlinq) məbləğində girov müqabilində azadlığa buraxılsa da, girov şərtləri yerinə yetirilənədək həbsdə saxlanılacaq.
Entoni Coşua və sürücü yüngül xəsarətlər alsalar da, Kayode Laqosun İkoyi rayonunda yerləşən xəstəxanaya aparılaraq iki gün nəzarət altında saxlanılıb. Qəzadan sonra boksçu anası ilə birlikdə həlak olan komanda üzvləri ilə vida mərasimində iştirak edib.
Qeyd edək ki, qəza Entoni Coşuanın ABŞ-da bloger-boksçu Ceyk Pol üzərində qələbəsini qeyd etməsindən cəmi 10 gün sonra baş verib. Hadisədən əvvəl Coşuanın bu ilin əvvəlində rinqə qayıtmağa hazırlaşdığı bildirilirdi.
Oqun ştat hökuməti isə açıqlamasında Entoni Coşua və digər sərnişinin dərhal Laqosda ixtisaslaşmış tibb müəssisəsinə yerləşdirildiyini, həkimlərin onların vəziyyətini stabil qiymətləndirdiyini və təcili tibbi müdaxiləyə ehtiyac olmadığını bəyan edib.
