Bitcoin-in qiyməti, qlobal bazarları bürüyən genişmiqyaslı riskdən qaçış dalğası ilə əlaqədar olaraq qısa müddətə 72 min dollardan aşağı düşərək təxminən 15 ayın ən aşağı səviyyəsini görüb.
Marja xəbə verir ki, Dünyanın ən böyük kriptovalyutası ötən ilin oktyabr ayında çatdığı zirvədən bəri 42 faizdən çox dəyər itirdiyi ucuzlaşma trendini davam etdirir. Bitcoin-in qiyməti cümə axşamı 71.540 dollara qədər geriləyib. Bu səviyyə Donald Trampın yenidən ABŞ prezidenti seçilməsindən sonrakı gün – 6 noyabr 2024-cü ildən bəri müşahidə edilən ən aşağı səviyyədir.
"Monarq Asset Management" şirkətinin idarəedici tərəfdaşı Şilianq Tanq bildirib ki, “Bazar hazırda bir etimad böhranından keçir”. Tanqın sözlərinə görə, enişin əvvəlki mərhələləri kriptovalyutaya xas likvidasiyalardan qaynaqlansa da, çərşənbə günü təzyiq daha geniş aktiv siniflərinə təsir edən stressdən "qidalanır".
ABŞ-də ticarət olunan Bitcoin birja investisiya fondlarına (ETF) pul axınları dəyişkən qalır. Bloomberg məlumatlarına görə, bazar ertəsi təxminən 562 milyon dollarlıq xalis giriş qeydə alınsa da, çərşənbə axşamı investorlar bu fondlardan 272 milyon dollar vəsait çıxarıb.
Bazar stressi dövrlərində Bitcoin-in təhlükəsiz liman rolu ilə bağlı şübhələr artır. Bitcoin bu il təxminən 17 faiz ucuzlaşdığı halda, daha geniş kriptovalyuta bazarının ümumi dəyəri son bir həftədə 460 milyard dollardan çox azalıb.
