Yanacaq çəninin zədələnməsi nəticəsində yaranan yanğından sonra bəzi reyslər yenidən həyata keçirilir...
Poliqon xəbər verir ki, Dubay Mülki Aviasiya İdarəsi pilotsuz uçuş aparatı ilə bağlı baş vermiş gecə insidentindən sonra Dubay Beynəlxalq Hava Limanında aviadaşımaların qismən bərpa olunduğunu açıqlayıb.
Emirliyin hakimiyyət orqanlarının yaydığı bəyanatda qeyd olunub ki, təhlükəsizlik tədbiri kimi tətbiq edilən müvəqqəti məhdudiyyətlərdən sonra hava limanından bəzi istiqamətlər üzrə reyslər tədricən yenidən həyata keçirilməyə başlayıb.
“Dubay Mülki Aviasiya İdarəsi təhlükəsizlik məqsədilə tətbiq olunan müvəqqəti dayandırmadan sonra Dubay Beynəlxalq Hava Limanından bəzi reyslərin ayrı-ayrı istiqamətlər üzrə mərhələli şəkildə bərpa edildiyini elan edir”, – deyə idarənin sosial şəbəkə platforması X-də yayılan məlumatında bildirilir.
Məlumata görə, daha əvvəl hava limanı ətrafında pilotsuz uçuş aparatı ilə bağlı insident nəticəsində yanacaq rezervuarlarından birinə ziyan dəyib və bu səbəbdən yanğın baş verib. Hadisədən sonra təhlükəsizlik tədbirləri çərçivəsində hava limanında uçuşların qəbulu və göndərilməsi müvəqqəti olaraq dayandırılmışdı.
Rəsmilər bildiriblər ki, yanğın qısa müddətdə lokallaşdırılıb və hadisə nəticəsində xəsarət alan olmayıb. Hazırda hava limanının fəaliyyəti mərhələli şəkildə bərpa olunur və aviasiya təhlükəsizliyi tədbirləri gücləndirilmiş rejimdə davam etdirilir.
Analitiklərin fikrincə, regionda davam edən hərbi-siyasi gərginlik fonunda belə insidentlər beynəlxalq nəqliyyat və enerji infrastrukturu üçün əlavə risklər yaradır.
Poliqon.info
