Ukrayna “dəmir-beton” kimi təhlükəsizlik zəmanətləri almalıdır...
Poliqon xəbər verir ki, Polşa baş naziri Donald Tuskun açıqlamasına görə, Alyaskada keçirilən sammitin nəticələrinə dair Avropa liderlərinin məsləhətləşmələri yekunlaşıb. Konsultasiyalarda ABŞ prezidenti Donald Trampın təqdim etdiyi məlumatlar və görüşün ümumi nəticələri müzakirə olunub.
Məlumata görə, Fransa prezidenti Emmanuel Makron, Almaniya kansleri Fridrix Merts, Böyük Britaniya baş naziri Kir Starmer, İtaliya baş naziri Corca Meloni və Polşa hökumət başçısı Tusk, Ukrayna prezidenti Vladimir Zelenskinin mövqeyini dinlədikdən sonra ortaq sənəd üzərində razılığa gəliblər.
Birgə bəyanatda vurğulanır ki, Avropa İttifaqı və Böyük Britaniyanın dəstəyi ilə ABŞ, Ukrayna və Avropa arasında üçtərəfli sammitin təşkili üçün işlər görüləcək. Liderlər həmçinin Ukraynaya göstərilən dəstəyin davam etdiriləcəyini xüsusi qeyd ediblər.
Sənəddə diqqətə çatdırılır ki, Ukrayna “dəmir-beton təhlükəsizlik zəmanətləri” almalıdır və öz əraziləri ilə bağlı qərarları yalnız Ukraynanın özü qəbul edə bilər.
Beləliklə, Avropa liderləri Alyaska görüşündən sonra həmrəy mövqe nümayiş etdirərək Ukraynanın təhlükəsizlik təminatlarının gücləndirilməsini və beynəlxalq dəstəyin davamlılığını bir daha təsdiqləyiblər.
Poliqon.info
