ABŞ prezidenti Donald Trampla rusiyalı həmkarı Vladimir Putin arasında Alyaskanın Ankoric şəhərində keçirilən üç saatlıq sammit beynəlxalq ictimaiyyətin diqqətini cəlb edib.
Hafta.az-ın yazdığına görə, ekspertlər liderlərin son altı ildə ilk görüşünü müxtəlif rakurslardan təhlil ediblər.
“Valday” klubunun eksperti Andrey Kortunov qeyd edib ki, sammit gözləntiləri tam doğrultmayıb: "Nümayəndə heyətlərinin nəzərə tutulan tədbirlərinin bəziləri təxirə salınıb, birgə şam yeməyi isə ümumiyyətlə ləğv edilib. Rusiya fond bazarlarındakı eniş bu məyusluğun təzahürüdür". Kortunov ABŞ-ın ikinci dərəcəli sanksiyalarla təzyiqi artırması ehtimalına qarşı xəbərdarlıq edib və Trampın “şəxsi siyasi kapitalını qorumaq üçün prosesi tamamilə tərk etməyəcəyini” proqnozlaşdırıb.
İSKRAN-ın direktoru Natalya Tsvetkovanın sözlərinə görə, sammit “deklarativ və simvolik” xarakter daşıyırdı. "Hər iki lider dialoqa açıq olduqlarını nümayiş etdirdilər, lakin konkret razılıq əldə olunmadı", - deyən Tsvetkova Trampın "məkik diplomatiyasını" davam etdirəcəyini və Avropanın da prosesə daxil edilməli olduğunu vurğulayıb.
Diqqət çəkən başqa bir detal Putinin mətbuat konfransında ilk çıxış etmək hüququ olub: “Bu, Trampın güclü xoşməramlı jesti idi”.
Tsvetkova sammiti 1986-cı ildə Reyqan-Qorbaçov Reykyavik görüşünə bənzədib: “Həmin sammitdə də heç bir saziş imzalanmadı, lakin ondan sonra mühüm addımlar atıldı”.
İSKRAN araşdırmaçısı Pavel Koşkin isə liderlərin “Krılovun nağılındakı personajlar kimi bir-birini təriflədiklərini” qeyd edərək, ehtiyatlı nikbinliklə əlavə edib ki, “tərəqqi yalnız üçtərəfli sammit (Putin-Trump-Zelenski) və Avropanın daxil olması ilə mümkün olacaq”.
Siyasi texnoloq Pavel Dubrovski Trampın "yorğun və məyus" göründüyünü iddia edib: "Tramp ya Ukraynadan tamamilə geri çəkilməklə seçicilərinə kiçik bir qələbə təklif edə bilərdi, ya da atəşkəs kimi böyük razılaşmanı təmin edə bilərdi. O, heç birini edə bilmədi". Dubrovski Rusiya tərəfinin diplomatik nəzakətlə beynəlxalq arenada möhkəm mövqeyini qoruyub saxladığını qeyd edərək, Putinin “Ukraynanın təhlükəsizliyini” vurğulamasının diqqətəlayiq olduğunu qeyd edib.
RGGU doktoru Oleq Xlopov Putinin "milli maraqları açıq şəkildə ifadə etdiyini" bildirib və əlavə edib: "Rusiya artıq Ukrayna gündəliyi ilə məhdudlaşan diplomatiya aparmır. Enerji, Arktika və strateji sabitlik kimi məsələlər müzakirə olunub". Xlopov, bu sammitin Tramp üçün "təbliğat əhəmiyyəti daşıdığını" vurğulayaraq, "O, sülh axtaran bir lider kimi imicini gücləndirdi" deyib. Mütəxəssislər Alyaska görüşünün "buzların qırılması" olduğunu bildirsələr də, Avropanın xüsusilə Ukrayna müharibəsinin sona çatması istiqamətində konkret addımların atılmasında daha fəal rol oynamalı olduğunu vurğulayırlar. Trampın Moskvaya səfəri və potensial üçtərəfli sammit yaxın günlərdə diplomatiya üçün yeni mərkəzə çevrilə bilər.
