Ukrayna Prezidenti Volodimir Zelenski Fransaya səfəri çərçivəsində Prezident Emmanuel Makronla ölkəsinin müdafiə qabiliyyətini gücləndirməyə yönəlmiş strateji saziş imzalayıb. Razılaşma Ukraynanın döyüş aviasiyasının yenilənməsi, hava məkanının qorunması və Rusiyanın davam edən hücumlarına qarşı dayanıqlığın artırılması baxımından son illərin ən böyük hərbi əməkdaşlıq addımı hesab olunur.
Sazişə əsasən, Ukrayna Fransa istehsalı olan 100 ədəd “Rafale” döyüş təyyarəsi alacaq. Bununla yanaşı, Fransanın hava hücumundan müdafiə sistemləri, radarlar, raketlər və digər hava-məkan komponentlərinin tədarükü də razılaşdırılıb. Paris bu paketi Ukraynanın “hava üstünlüyü və hava qalxanı qurmaq” strategiyasının mərkəzi elementi kimi təqdim edir.
“Rafale” Avropanın ən modern çoxrolu döyüş təyyarələrindən hesab olunur. Fransanın “omniröl” konseptinə əsaslanan bu platforma hava–hava döyüşündən tutmuş yerüstü hədəflərin vurulmasına, dəniz əməliyyatlarına və kəşfiyyata qədər geniş spektrdə istifadə edilir. Təyyarə AESA tipli RBE2 radarı, SPECTRA elektron müdafiə sistemi, yüksək manevr qabiliyyəti və müasir silah platformaları ilə seçilir.
Müqayisələr göstərir ki, “Rafale” Avropanın digər təyyarələri – “Eurofighter Typhoon” və “Gripen”lə müqayisədə daha balanslı döyüş funksiyalarına malikdir. “F-16” ilə müqayisədə isə daha yüksək texnoloji avadanlıq, daha güclü müdafiə sistemi və modernləşmə potensialı təqdim edir.
Fransa bu sazişlə Ukraynanın hava hücumundan müdafiə sistemlərinin gücləndirilməsini də öhdəsinə götürür. Paketə SAMP/T zenit-raket kompleksləri, yeni nəsil radarlar, idarəolunan raketlər və əlavə aviasiya vasitələri daxildir. Bu, Ukraynanın Rusiya tərəfindən həyata keçirilən raket və dron hücumlarına qarşı müdafiə imkanlarını əhəmiyyətli dərəcədə artırmağa hesablanıb.
Razılaşmanın tam maliyyələşdirilməsi və icra mexanizmləri üzərində iş davam edir. Bunun üçün Avropa İttifaqının fondlarının və Rusiyanın dondurulmuş aktivlərinin istifadəsi müzakirə olunur. Təyyarələrin çatdırılması mərhələli şəkildə həyata keçiriləcək.
Yeni saziş Ukraynanın hava məkanının qorunması və NATO standartlarına uyğun aviasiya infrastrukturunun qurulması baxımından mühüm addım hesab edilir. Avropa üçün isə bu əməkdaşlıq Yaxın Şərq və Şərqi Avropa təhlükəsizlik arxitekturasında güclü mesaj kimi qiymətləndirilir.
Musavat.com
