Tədbir iştirakçılar və pərəstişkarlar üçün bayrama çevrildi
Avstriyanın paytaxtı Vyana şəhərinin meriyasında 70-ci Avroviziya mahnı müsabiqəsinin açılış mərasimi keçirilib. Tədbir iştirakçılar və pərəstişkarlar üçün möhtəşəm bayrama çevrilib.
Avroviziya - 2026 mahnı müsabiqəsinin iştirakçıları Avropanın ən vacib almandilli teatrlarından biri - milli Burqteatrdan Avstriya paytaxtının meriyasına kimi uzanan 170 metrlik firuzəyi xalçanın üzəri ilə gediblər və burada sənətçiləri Vyana meri Mixael Lüdviq və müsabiqə təşkilatçıları qarşılayıblar.
Builki Avroviziyaya təşkilatçılıq müsabiqənin tarixində ən çətin hazırlıqlardan biri idi. Beş ölkənin - Niderland, İrlandiya, İslandiya, İspaniya və Sloveniyanın yayımçıları İsrailin iştirakı səbəbindən Avroviziyanı boykot etdiklərini bildiriblər.
Lakin 30 minə yaxın insan tutumu olan şəhər meriyasının qarşısındakı meydanda İsrail nümayəndəsi Noam Bettan xalça sərilmiş yolda gəzərkən heç bir narazılıq səsi eşidilməyib. Düzdür, açılış günü – mayın 10-da və ya bir gün əvvəl, əsas şənliklərdən kənarda kiçik etirazlar olub.
Bu etirazçılar İsrailin Qəzza zolağında çoxsaylı fələstinlilərin itkisi ilə nəticələnən hərbi əməliyyatı səbəbindən İsrailin Avroviziyadan kənarlaşdırılmasını tələb edirlər. Müharibə, 2023-cü ilin oktyabrında təxminən 1200 insanın ölümünə səbəb olan HƏMAS-ın İsrailə qarşı terror hücumuna cavab idi. Avroviziya mahnı müsabiqəsi boyunca tətbiq olunan tədbirlərlə yanaşı, Vyanada İsrail nümayəndə heyətini qorumaq üçün xüsusi təhlükəsizlik tədbirləri görülüb. Avstriya hakimiyyətinin məlumatına görə, onlar mümkün kiberhücumların qarşısını almaq üçün ABŞ FTB ilə əməkdaşlıq edirlər.
Lakin açılış mərasimi insidentsiz keçib. Azarkeşlər hər bir iştirakçını smartfonlarını qaldıraraq Avroviziya mahnısının sədaları altında qarşılayıblar.
Açılış mərasimi müsabiqə ərzində bütün iştirakçıların bir araya gəldiyi yeganə tədbirdir. Onlardan bəziləri ilk iki yarımfinaldan sonra Avroviziya mahnı müsabiqəsindən kənarlaşdırılacaq. 16 may şənbə günü qapalı Wiener Stadthalle stadionunun arenasında keçiriləcək finalda builki müsabiqəyə qatılan 35 iştirakçıdan 25-i qələbə uğrunda mübarizə aparacaq.
Açılış mərasimi Avroviziyadakı ən cazibədar tədbirdir. İfaçılar bunun üçün xüsusi geyimlər seçirlər. Builki mərasim də istisna deyildi. Qara və qırmızı rənglər trend rəngləri idi.
Bukmekerlərin fikrincə, final ərəfəsində finlandiyalı skripkaçı Linda Lampenius və müğənni Pete Parkkonen duetinin yarışmada qalib gəlmək üçün ən yaxşı şansı var. Onların əsas rəqibləri Yunanıstandan Akylos, danimarkalı Sören Torpeqor Lund, Fransadan Monroe və Avstraliyadan Delta Qudrem hesab olunurlar. Ukraynanı təmsil edən Leleka da ilk onluğa düşmək üçün mübarizə aparır. Qrupun üzvləri kimi, aparıcı müğənnisi Viktoriya Kornikova da Berlində canlı yaşayırlar. Almaniyanı 2026-cı ildə Avroviziya mahnı müsabiqəsində Sara Engels təmsil edəcək.
Yarımfinal və finalın canlı yayımları Bakı vaxtı ilə saat 23:00-da başlayır.
Mayın 16-da keçiriləcək final ərəfəsində iki yarımfinalda 20 finalçı və finala birbaşa vəsiqə qazanan beş ölkə müəyyən ediləcək ( Fransa, İtaliya, Almaniya, Böyük Britaniya və Avstriya artıq avtomatik olaraq finala vəsiqə əldə ediblər).
Son məlumata görə, dünən gecə saatlarında başa çatmış birinci yarımfinalda 15 ölkə - Moldova, İsveç, Xorvatiya, Yunanıstan, Portuqaliya, Gürcüstan, Finlandiya Monteneqro, Estoniya, İsrail, Belçika, Litva, San Marino, Polşa və Serbiya çıxış etmişlər və bu ölkələrdən 10-nu finala çıxmışdır.
Sabah, mayın 14-də keçiriləcək ikinci yarımfinalda isə Bolqarıstan, Azərbaycan, Rumıniya, Lüksemburq, Çexiya, Ermənistan, İsveçrə, Kipr, Latviya, Danimarka, Avstraliya, Ukrayna, Albaniya, Malta və Norveç finala aparan 10 vəsiqə uğrunda mübarizə aparacaqlar.
Avroviziya mahnı müsabiqəsinin 70-ci, yubiley yarışmasında ölkəmizi JIVA (Cəmilə Həşimova) “Just Go” kompozisiyası ilə təmsil edəcək.
