“Atletiko” yeni investora satıldı

İspaniyanın “Atletiko” klubu səhmlərinin nəzarət paketinin “Apollo Sports Capital” (ASC) investisiya şirkətinə satıldığını elan edib.

Arena.az xəbər verir ki, razılaşma çərçivəsində Migel Anxel Xil və Enrike Sereso kluba müvafiq olaraq baş direktor prezident kimi rəhbərlik etməyə davam edəcək və səhmdar olaraq qalacaqlar.

Onların rəhbərliyi altında son 20 ildə Madrid təmsilçisi özünü Avropanın ən uğurlu və tanınmış futbol klublarından biri kimi tanıdıb.

Səhmdarlar klubun uzunmüddətli planlarını dəstəkləmək üçün kapital təmin etməyi, o cümlədən “Atletiko”nun komandalarına və böyük infrastruktur layihələrinə daha çox investisiya qoymağı planlaşdırırlar. Satış prosesinin tam olaraq 2026-cı ildə yekunlaşacağı da vurğulanıb.

“Kluba sadiq olan yeni tərəfdaşımızı salamlamaqdan məmnunuq. “Apollo Sports Capital” “Atletiko” və azarkeşlərinin tarixinə, ənənəsinə, şəxsiyyətinə hörmət edən, eyni zamanda böyüməmizi və rəqabət qabiliyyətimizi qorumaq üçün əlavə qaynaqlar və həvəs gətirən etibarlı müttəfiqimizdir”, – klubun rəsmi saytı Xilin sözlərini sitat gətirib.

Xatırladaq ki, Madrid təmsilçisi İspaniya çempionatının cari mövsümündə 12 turdan sonra 25 xalla turnir cədvəlinin 4-cü pilləsində qərarlaşıb. Komanda UEFA Çempionlar Liqasının Liqa mərhələsində də 6 xal toplayıb.

Xəbəri istədiklərinizlə paylaşın