Niderlandın ING bank qrupu Hörmüz boğazının bağlanması riskləri fonunda “Brent” markalı neftin qiyməti ilə bağlı proqnozlarını qaldırıb.
Bu barədə Trend ING-nin son hesabatına istinadən xəbər verir.
“Biz Hörmüz boğazının tam bağlanması ehtimalının çox aşağı olmasını hesab etsək də, geosiyasi risklərin əhəmiyyətli dərəcədə artdığı açıq-aydındır. İsrailin İrana qarşı davam edən hücumlarını nəzərə alsaq, İran neftinin tədarükünə real risklər mövcuddur. Bu səbəbdən biz cari ilin qalan dövrü üzrə neft proqnozumuzu yenidən nəzərdən keçirdik. Əvvəllər üçüncü rüb üçün Brent markalı neftin orta qiymətinin bir barel üçün 62 dollar olacağını gözləyirdik, indi bu proqnozu 70 dollara qaldırmışıq. Dördüncü rüb üzrə proqnozu da 59 dollardan 64 dollara yüksəltmişik”, – deyə ING-nin son hesabatında bildirilir.
Sənəddə qeyd olunur ki, tədarüklərdə yarana biləcək istənilən pozuntular qiymətlərə yenidən baxılmasını tələb edə bilər.
ING analitikləri Hörmüz boğazının qlobal neft və mayeləşdirilmiş təbii qaz (MTQ) tədarükləri baxımından əsas nöqtə olduğunu və onun vasitəsilə ümumi dənizlə neft daşımalarının dördə bir hissəsinin həyata keçirildiyini xatırladıblar.
Eyni zamanda, qlobal MTQ tədarükünün 20 faizə yaxını məhz bu marşrutdan keçir.
“Neft axınlarının müəyyən qədər yönünü dəyişmək mümkündür. Səudiyyə Ərəbistanının Qırmızı dənizdən neft daşımağa imkan verən, sutkada 5 milyon barel gücündə “East-West” neft kəməri mövcuddur. Birləşmiş Ərəb Əmirliklərinin də Hörmüzü keçmədən Oman körfəzinə çıxan, gündəlik 1,8 milyon barel ötürücülük qabiliyyəti olan kəməri var. İran isə həmin körfəzə doğru gündəlik təqribən 300 min barel ötürücülük qabiliyyəti olan neft kəmərinə malikdir. Lakin nəzərə alsaq ki, Hörmüz boğazından gündəlik 20 milyon bareldən artıq neft keçir, bu tədarükün mühüm hissəsi risk altında qalır.
