Avropa İttifaqına (Aİ) üzv ölkələr Macarıstanın nümunəsini izləyərək Ukraynanın Aİ-yə üzvlüyü ilə bağlı referendum keçirsəydilər, əhalinin əksəriyyəti bu addıma qarşı çıxardı.
Bakues.az xəbər verir ki, bunu Macarıstan Baş naziri Viktor Orban deyib.
O qeyd edib ki, Brüsseldəki bürokratlar Ukraynanın Aİ-yə üzvlüyünü “mürəkkəb arqumentlərlə əsaslandıra bilsələr də”, sadə vətəndaşların bu məsələyə münasibəti çox aydındır:
“Əgər müharibə vəziyyətində olan Ukraynanı İttifaqa daxil etsək, müharibəni də Avropaya daxil etmiş olarıq. Biz Avropada müharibə istəmirik. Ukraynanın Aİ-yə daxil olması Macarıstan iqtisadiyyatı üçün ciddi risklər yaradır. Ukraynanın üzvlüyü iqtisadiyyatımızı dağıda bilər. Bu təhlükə çox böyükdür. Brüssel vətəndaşların rəyini nəzərə almadan qərar qəbul etməklə yanlış yol tutur”.
Baş nazir əlavə edib ki, Macarıstan artıq bu prosesə mane olub və Ukraynanın Aİ-yə üzvlüyünü qəbul etməyəcək.
Qeyd edək ki, Orban daha əvvəl ölkəsində keçirilən referendumda seçicilərin 95 faizi Ukraynanın Aİ-yə üzvlüyünə qarşı çıxdığını bildirmişdi.
Avropa Komissiyası isə Macarıstanda keçirilmiş referendumla bağlı şərhində qeyd edib ki, Ukraynanın Aİ-yə üzvlüyü ilə bağlı yekun qərarı İttifaqın bütün üzv dövlətləri birgə verməlidir və bu, uzunmüddətli və çoxtərəfli hüquqi prosedura əsaslanır.
