U-19 millimizdə Həsən Nəzərlini Mehdi Mütəllimli əvəzlədi

Bakıda toplanışda olan 19 yaşadək futbolçulardan ibarət Azərbaycan milli komandasının (U-19) heyətində dəyişiklik baş verib.

Arena.az bu barədə AFFA-nın saytına istinadən xəbər verir.

Bildirilir ki, Türkiyənin “Ankaragücü” klubunun yarımmüdafiəçisi Həsən Nəzərlinin əvəzinə “Qarabağ”ın oyunçusu Mehdi Mütəllimli milliyə dəvət alıb. Nəzərlinin yığmadan kənarlaşdırılmasının dəqiq səbəbi açıqlanmayıb.

Xatırladaq ki, U-19 millimiz ötən gündən etibarən Maltada keçiriləcək Avropa çempionatının seçmə mərhələsinin oyunlarına hazırlıq üçün toplanışa başlayıb. Elxan Abdullayevin baş məşqçisi olduğu komanda noyabrın 8-nə qədər Bakıda təlim-məşq toplanışı keçəcək.

Seçmə mərhələdə 13-cü qrupda yer almış U-19 millimiz Çexiya, Şimali İrlandiya və Malta yığmaları ilə qarşılaşacaq.

Qeyd edək ki, Avropa çempionatının seçmə mərhələ oyunları noyabrın 9-dan 19-na qədər davam edəcək. 13-cü qrupun oyunları Maltada təşkil olunacaq.

Xəbəri istədiklərinizlə paylaşın