"Kurskda komanda mərkəzinə dəqiq zərbə nəticəsində daha bir rusiyalı general öldürülüb.."
Ukrayna Müdafiə Qüvvələri Rusiyanın hərbi rəhbərliyinə qarşı sarsıdıcı hücum həyata keçirib.
Moderator.az xəbər verir ki, bu barədə "euronews.com" nəşri məlumat yayıb.
Məlumatda deyilir ki, iyulun 2-də Kursk vilayətinin sərhəd bölgəsində Ukrayna raketləri ilə ön cəbhə qərargahına endirilmiş zərbə nəticəsində Rusiya Hərbi Dəniz Qüvvələrinin baş komandanının müavini, general-mayor Mixail Qudkov öldürülüb.
Əvvəllər 155-ci Dəniz Piyada Briqadasına rəhbərlik edən Qudkov müharibədə fəal iştirakına görə "Rusiya Qəhrəmanı" medalı ilə təltif olunub. Həmin gün onunla birlikdə bir neçə yüksək rütbəli zabit də həyatını itirib. Qeyri-rəsmi məlumatlara görə, zərbə nəticəsində ondan çox rus hərbçi, o cümlədən briqadanın yeni komandiri, müavinləri və tabor rəhbərləri də məhv edilib.
Lipetskdə "Energiya" zavoduna hücum: "İsgəndər-M" və X-35 raketlərinə zərbə
Eyni gecə Ukrayna dronları Rusiya hərbi sənayesinə strateji zərbə endirib. Lipetsk vilayətinin Yeleç şəhərində yerləşən və "İsgəndər-M" raket kompleksləri üçün batareyalar istehsal edən "Energiya" zavoduna hücum nəticəsində müəssisənin fəaliyyəti dayandırılıb. Ukrayna Silahlı Qüvvələrinin məlumatına görə, bu zavod həm də qanadlı "X-35U" raketləri və planlaşdırılan aviabombalar üçün enerji modulları hazırlayır.
Ukrayna Baş Qərargahı zərbə endirilməsini təsdiq edib və əməliyyatın məqsədinin Rusiyanın raket bazasını zəiflətmək olduğunu bəyan edib. Yerli administrasiya ilkin olaraq müəssisənin adını gizli saxlasa da, daha sonra müstəqil mənbələr və Ukrayna rəsmiləri bu hədəfin "Energiya" zavodu olduğunu açıqlayıb.
Rusiyanın itkiləri artır: 100 mindən çox ölən hərbçi təsdiqlənib
Ukrayna Baş Qərargahı bildirir ki, müharibənin əvvəlindən bəri Rusiya ordusu 1 milyondan çox insan itkisi verib. "Mediazona" və BBC-nin açıq mənbələrə əsaslanan statistikasında isə artıq 111 min rus hərbçisinin şəxsiyyəti təsdiqlənib. Son aylar ərzində Rusiyanın yüksək rütbəli zabitləri arasında itkilərin artması diqqət çəkir.
