Pakistan, Hindistanın idarə etdiyi Kəşmir və Nepalda qəfil və güclü yağışlar böyük fəlakətə səbəb olub.
Editor.az xarici mediaya istinadla xəbər verir ki, daşqınlar və torpaq sürüşmələri nəticəsində 300-ə yaxın insan həlak olub, yüzlərlə insan itkin düşüb.
Qeyd edək ki, iyunun əvvəlində başlayan musson mövsümü bu il Himalayalara həmişəkindən daha çox yağıntı gətirib. Cəmi bir saat ərzində yağan güclü yağış çayları aşıb, körpüləri dağıdıb, kəndləri palçığa qərq edib. Pakistanın şimal-qərbi, Hindistanın idarə etdiyi Kəşmirin dağ kəndləri və Nepalın şərqi ən çox zərər çəkib. Xilasetmə qrupları hələ də itkin düşənləri axtarır və sakinlər nə vaxtsa belə bir şey görmədiklərini deyir.
Sosial şəbəkələrdə paylaşılan görüntülərdə yolların gur çaylara çevrildiyi, evlərin uçduğu, maşınların su altında qaldığı əks olunub. Bir videoda palçıq və dağıntıların nəhəng divar kimi dağdan aşağı axdığı an çəkilib. Meteorologiya rəsmiləri bölgədə daha da leysan və daşqınların olacağı barədə xəbərdarlıq edib. Hakimiyyət insanları turizm bölgələrindən uzaq durmağa və çaylardan uzaq durmağa çağırır.
//Gülnarə Abasova, Editor.az
