İsrail Müdafiə Qüvvələri (IDF) İrana zərbələr endirmək üçün 200-dən çox döyüş təyyarəsindən istifadə edərək, onun ərazisindəki 100-ə yaxın hədəfi vurub...
Poliqon xəbər verir ki, bu barədə İsrail Müdafiə Nazirliyinin sözçüsü Effie Defrinə istinadən CNN telekanalı məlumat yayıb.
Telekanalın məlumatına görə, İrana indiyədək 330-dan çox müxtəlif sursat atılıb.
Defrin deyib ki, İsrailin zərbələri dəqiq və sinxronlaşdırılmış əməliyyatın bir hissəsidir və İsrail pilotları İranın müxtəlif bölgələrində hərbi hədəflərə və nüvə proqramı obyektlərinə zərbələr endirməyə davam edirlər.
İsrail ordusu həmçinin İranın üç yüksək rütbəli hərbi komandirini, o cümlədən respublika silahlı qüvvələrinin baş qərargah rəisi Məhəmməd Baqiri və SEPAH-ın komandiri Hüseyn Səlamini məhv etdiyini iddia edir.
İyunun 13-nə keçən gecə İsrail, məqsədi İranın nüvə və raket proqramlarına zərər vurmaq olan Am Kelavi (Şir kimi millət) əməliyyatına başladığını elan etdi. Bunun ardınca yəhudi dövlətinin ordusu Tehran və Natanz da daxil olmaqla bir neçə əhalinin məskunlaşdığı bölgələrdə hədəflərə zərbələr endirib. Hədəflər İslam İnqilabı Keşikçiləri Korpusunun (SEPAH) üzvlərinin yerləşdiyi hərbi bazalar, hava hücumundan müdafiə sistemləri və yaşayış kompleksləri olub.
Bunun fonunda İranın ali dini lideri Əli Xamenei vətəndaşlara müraciət edib. O, hücumlar nəticəsində bir neçə alim və komandirin həlak olduğunu bildirib. Eyni zamanda Xamenei İsrailin zərbələrinə cavab məsələsində İran qoşunlarına “hərəkət azadlığı” verdiyini bildirib.
Bundan əvvəl ABŞ-ın İsrailin İrana zərbələrinə qoşula biləcəyi məlum olub.
Poliqon.info
