ain.az, Marja.az portalına istinadən məlumatı açıqlayır.
Pakistanın Baş naziri Şahbaz Şərif, ABŞ Prezidenti Donald Trampdan İrana verilən müddətin iki həftə uzadılmasını, İran rəhbərliyindən isə Hörmüz boğazını iki həftəlik açmasını xahiş edib.
Marja xəbər verir ki, Şərif sosial media hesabında etdiyi paylaşımda ABŞ ilə İran arasında aparılan danışıqların “güclü şəkildə irəlilədiyini” bildirib.
Paylaşımında o qeyd edib: “Yaxın Şərqdə davam edən müharibənin sülh yolu ilə həlli üçün diplomatik səylər ardıcıl, güclü və effektiv şəkildə irəliləyir və yaxın gələcəkdə konkret nəticələr vermək potensialına malikdir.”
Şahbaz Şərif açıqlamasında belə deyib:
“Diplomatiyanın öz axarında davam etməsinə imkan yaratmaq üçün Prezident Trampdan müddəti daha iki həftə uzatmasını səmimi qəlbdən xahiş edirəm. Pakistan, xoş niyyət jesti olaraq, iranlı qardaşlarımızdan Hörmüz boğazını iki həftə müddətinə açmalarını səmimiyyətlə rica edir.”
Baş nazir Şərif bölgədə davamlı sülh və sabitliyin təmin olunması üçün “diplomatiyaya müharibəni qəti şəkildə sona çatdırmaq imkanı verilməli olduğunu” vurğulayaraq, “bütün münaqişə tərəflərini” iki həftəlik atəşkəsə çağırıb.
Trampın ultimatomu
Tramp bu gün Fox News-a verdiyi açıqlamada İrana qarşı indiyədək görünməmiş bir hücum planına işarə edərək, “Saat 20:00-da bu baş verəcək” deyib.
Tramp sosial media hesabındakı paylaşımında isə belə yazıb: “Bu gecə bir sivilizasiya (mədəniyyət) yox olacaq və bir daha heç vaxt geri qayıtmayacaq. Bunun baş verməsini istəmirəm, amma çox güman ki, baş verəcək.”
Daha əvvəl Hörmüz boğazını 48 saat ərzində açmayacağı təqdirdə İranı hədələyən Tramp, 5 aprel tarixli paylaşımında “Çərşənbə axşamı ABŞ-ın Şərq sahili vaxtı ilə saat 20:00-da (Bakı vaxtı ilə: 8 aprel 04:00)” ifadəsinə yer verib.
Sonrakı hadisələr barədə daha çox məlumat almaq üçün ain.az saytını izləyin.
