Ər-Riyad Tehrana krallığın torpaqları və hava məkanının hərbi məqsədlərlə açılmayacağına dair zəmanət verib...
Poliqon xəbər verir ki, Səudiyyə Ərəbistanı öz ərazisinin və hava məkanının ABŞ tərəfindən İrana qarşı zərbələr endirmək üçün istifadə olunmayacağı barədə Tehrana rəsmi təminat verib. Bu barədə Agence France-Presse (AFP) agentliyi Səudiyyə hökuməti və ordusuna yaxın mənbələrə istinadən məlumat yayıb.
Mənbələrin bildirdiyinə görə, Ər-Riyad İran tərəfini birbaşa məlumatlandıraraq vurğulayıb ki, krallıq İslam Respublikasına qarşı heç bir hərbi əməliyyatda iştirak etməyəcək və Səudiyyə ərazisi, eləcə də hava məkanı bu məqsədlər üçün açıq olmayacaq. Rəsmi dairələr qeyd ediblər ki, bu mövqe regionda gərginliyin daha da artmasının qarşısını almağa yönəlib.
Yanvarın 13-də The Wall Street Journal qəzeti yazıb ki, Səudiyyə Ərəbistanı, Oman və Qətər ABŞ-ni İrana qarşı mümkün hərbi zərbələrdən çəkindirməyə çalışır. Məqalədə qeyd olunub ki, Körfəz ölkələri belə bir addımın Yaxın Şərqdə genişmiqyaslı eskalasiyaya səbəb ola biləcəyindən ciddi narahatdır.
Bundan əvvəl isə ABŞ prezidenti Donald Tramp İranda olan ABŞ müttəfiqlərinə və Amerika vətəndaşlarına dərhal ölkəni tərk etmələri barədə çağırış edib. Bu bəyanat regionda hərbi toqquşma risklərinin artdığına dair ehtimalları daha da gücləndirib.
Analitiklərin fikrincə, Səudiyyə Ərəbistanının bu açıq mövqeyi Vaşinqtonun mümkün hərbi planlarını məhdudlaşdıra, eyni zamanda Tehranla münasibətlərdə ehtiyatlı diplomatik xəttin seçildiyini göstərə bilər.
Poliqon.info
